Shańǵymen tuǵyrdan sekirýden Qazaqstan komandasy Beijińdegi qysqy Olimpiada oiyndaryna tórt litsenziia jeńip aldy dep habarlaidy Olympic.kz.
Qazirgi sátte qazaqstandyq komanda enshisinde erler arasyndaǵy eki kvota bar. Litsenziia jekelegen atletterge emes, komandaǵa beriledi. Sondyqtan, sońǵy sheshimdi qabyldaý quqyǵy bapkerlerge berilgen.
«Osy ýaqytqa deiin úlken jumys atqaryldy. Moiyndaý kerek, irikteý syny óte qiyn ótti. Álemdegi básekelestik kún sanap artýda, pandemiiaǵa bailanysty jaǵdai da bizdiń josparlarymyzǵa birqatar ózgeris alyp keldi. Biz tórt litsenziia ielendik.
Bizdiń sportshylar qar ústinde de, qurǵaq jerde de jattyǵý ótkizdi. Sporttyq babyn saqtady. Qyrkúiek aiynda Shýchinsk qalasynda shańǵymen tuǵyrdan sekirýden erler arasyndaǵy jazǵy Gran-pri seriiasy ótti. K-90 tuǵyrynan sekirýden Sergei Tkachenko altynshy oryn aldy. Bul - Qazaqstan komandasy úshin tarihi nátije. Sońǵy álemdik jarystarda Danil Vasilev pen Sabyrjan Múminov jaqsy kórsetkish tirkep júr.
Dál qazirgi sátte sheshim qabyldaý ústindemiz. Shyndyǵyn aitar bolsaq, Tkachenko men Múminov arasynda tańdaý jasap jatyrmyz. Olardyń fizikalyq daiyndyǵyna jiti mán berip, bapkerlermen aqyldasamyz. Sońǵy ári naqty sheshimdi sál keiinirek habarlaimyz. Qazir eń mańyzdy jarys qarsańynda barlyq karantin talaptaryn saqtap, jattyǵý jasap jatyrmyz», - deidi komandanyń bas bapkeri Qairat Biekenov.
