QR Bilim jáne ǵylym ministri Kúlásh Shámshidinovanyń tóraǵalyǵymen beinekonferentsbailanys rejiminde QR Úkimeti janyndaǵy kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komissiianyń HHIV otyrysy ótti.
QR BǴM baspasóz qyzmetiniń habarlaýynsha, otyrysta bilim berý uiymdarynda oqýshylardyń qaýipsizdigin arttyrý, balalardyń jazǵy demalysyn uiymdastyrý, balalar úilerin qysqartý, psihologiialyq meditsinalyq-pedagogikalyq komissiialardyń qyzmeti tóńiregindegi máseleler qaraldy.
Jiynǵa Qazaqstan Respýblikasy Parlamenti Senatynyń depýtaty, Qazaqstan Respýblikasynyń Bala quqyqtary jónindegi ýákil Sáýle Aitpaeva, eńbek jáne halyqty áleýmettik qorǵaý vitse-ministri Svetlana Jaqypova, VAK músheleri, ortalyq memlekettik jáne jergilikti atqarýshy organdar, Adam quqyqtary jónindegi ulttyq ortalyq, halyqaralyq jáne úkimettik emes uiymdardyń basshylary qatysty.
Sóz kezeginde, eńbek jáne halyqty áleýmettik qorǵaý vitse-ministri Svetlana Jaqypova Densaýlyq saqtaý ministrligi, Bilim jáne ǵylym ministrligi, Eńbek jáne halyqty áleýmettik qorǵaý ministrlikteri ózara birlese otyryp, «Otbasyny jetekteý institýtyn» qurý qajet degen usynysyn bildirdi.
Otyrysty qorytyndylaǵan Qazaqstan Respýblikasy Bilim jáne ǵylym ministri Kúlásh Shámshidinova jazǵy demalys ýaqytynda balalardyń qaýipsizdigin qajetti deńgeide qamtamasyz etýdi, sondai-aq oqýshylardyń qaýipsizdigin, jazǵy demalyspen balalardyń qamtylýyn ulǵaitý, eldegi balalar úilerin qysqartý, psihologiialyq meditsinalyq-pedagogikalyq komissiialardyń qyzmetin kúsheitý boiynsha qosymsha sharalardy qabyldaý jóninde naqty tapsyrmalar berdi.
Aita keteiik, kámeletke tolmaǵandardyń isi jáne olardyń quqyqtaryn qorǵaý jónindegi vedomstvoaralyq komissiia (VAK) Qazaqstan Respýblikasy Úkimeti janyndaǵy konsýltatsiialyq-keńesshi organ bolyp tabylady. Atalǵan komissiia kámeletke tolmaǵandar arasyndaǵy quqyq buzýshylyqtardyń, qadaǵalaýsyz jáne panasyz qalýdyń aldyn alý, olardyń quqyqtary men zańdy múddelerin qorǵaý jáne balalardyń quqyqtaryn qorǵaý salasyndaǵy memlekettik saiasatty iske asyrýdy qamtamasyz etý jónindegi usynystardy ázirleý maqsatynda 2007 jyly qurylǵan.
