Kórneki foto: John Harper / Getty Images
"Samuryq-Qazyna" qorynyń tóraǵasy Nurlan Jaqypov Qazaqstanda atom elektr stantsiiasynyń qurylysyn josparlaýdaǵy qiyndyqtarǵa toqtaldy, - dep habarlaidy Tengrinews.kz saity.
Qordyń baspasóz brifinginde Jaqypov atom elektr stantsiiasyn salý máselesin kóterdi. Onyń aitýynsha, sheshim áli qabyldanbaǵan.
"Qazaqstanda AES bola ma, joq pa, sheshý úshin kóptegen faktor bar. Osy sheshimdi qabyldaǵannan keiin qandai óndirýshi nemese satýshymen salatynymyz týraly aita alamyz. Búgin atom elektr stantsiiasy salynatyn jerge qatysty máseleler bar ekenin kórip otyrmyz. Biz túsinýimiz kerek jáne oryn týraly sheshim qabyldaýymyz kerek, óitkeni birqatar talap bar, sonyń ishinde - sý men ekologiia", - dedi Jaqypov.
Ol Qazaqstanda sý máselesi ótkir másele ekenin túsindirdi.
"Atom elektr stantsiiasyna qoiylatyn talaptardyń biri - jaqsy sý qoimasynyń bolýy. Men esepterdi oqyp jatyrmyn, Kaspii kirmeidi, Balqash ta taiazdanyp jatyr. Eger qazir oryndy tańdap, atom elektr stantsiiasyn salsaq, al 10 jyldan keiin sý taǵy 10 metrge tartylsa, sonda ne bolady? Bári ózgeredi. Darvin aitqandai: "Eń myqtylar emes, eń jyldam beiimdeletinder aman qalady". Biz jai ǵana sheshim qabyldai almaimyz (josparsyz. – esk.), 10 jyldan soń, ol salynǵannan keiin sý bolmai qalsa she?" – dep kúdigimen bólisti qor tóraǵasy.
Sondai-aq, onyń aitýynsha, atom elektr stantsiiasy arzanǵa túspeidi.
"Stantsiianyń quny milliardtaǵan dollarǵa baǵalanady. Bul atom elektr stantsiiasy ózin-ózi aqtaýy úshin tarif qandai bolýy kerek? Memleket retinde mundai tarifke shamamyz kele me? Barlyǵymyz elektr energiiasyn paidalanamyz, uialy telefonymyzdy zariadtaimyz, internetke kiremiz, teledidar kóremiz. Al erteń atom elektr stantsiiasyn salatyn bolsaq, onda elektr energiiasynyń quny qansha bolady? Munda barlyq faktorlardy eskerý qajet. Biz bul qymbat rahatqa daiynbyz ba, sony ózimiz túsinýimiz kerek?" - dedi Jaqypov.
Soǵan qaramastan qor basshysy elimizde elektr qýatynyń tapshylyǵy bar ekenin, bul úshin birdeńe isteý kerektigin moiyndady.
