كٶرنەكٸ فوتو: John Harper / Getty Images
"سامۇرىق-قازىنا" قورىنىڭ تٶراعاسى نۇرلان جاقىپوۆ قازاقستاندا اتوم ەلەكتر ستانتسيياسىنىڭ قۇرىلىسىن جوسپارلاۋداعى قيىندىقتارعا توقتالدى, - دەپ حابارلايدى Tengrinews.kz سايتى.
قوردىڭ باسپاسٶز بريفينگٸندە جاقىپوۆ اتوم ەلەكتر ستانتسيياسىن سالۋ مەسەلەسٸن كٶتەردٸ. ونىڭ ايتۋىنشا, شەشٸم ەلٸ قابىلدانباعان.
"قازاقستاندا اەس بولا ما, جوق پا, شەشۋ ٷشٸن كٶپتەگەن فاكتور بار. وسى شەشٸمدٸ قابىلداعاننان كەيٸن قانداي ٶندٸرۋشٸ نەمەسە ساتۋشىمەن سالاتىنىمىز تۋرالى ايتا الامىز. بٷگٸن اتوم ەلەكتر ستانتسيياسى سالىناتىن جەرگە قاتىستى مەسەلەلەر بار ەكەنٸن كٶرٸپ وتىرمىز. بٸز تٷسٸنۋٸمٸز كەرەك جەنە ورىن تۋرالى شەشٸم قابىلداۋىمىز كەرەك, ٶيتكەنٸ بٸرقاتار تالاپ بار, سونىڭ ٸشٸندە - سۋ مەن ەكولوگييا", - دەدٸ جاقىپوۆ.
ول قازاقستاندا سۋ مەسەلەسٸ ٶتكٸر مەسەلە ەكەنٸن تٷسٸندٸردٸ.
"اتوم ەلەكتر ستانتسيياسىنا قويىلاتىن تالاپتاردىڭ بٸرٸ - جاقسى سۋ قويماسىنىڭ بولۋى. مەن ەسەپتەردٸ وقىپ جاتىرمىن, كاسپيي كٸرمەيدٸ, بالقاش تا تايازدانىپ جاتىر. ەگەر قازٸر ورىندى تاڭداپ, اتوم ەلەكتر ستانتسيياسىن سالساق, ال 10 جىلدان كەيٸن سۋ تاعى 10 مەترگە تارتىلسا, سوندا نە بولادى? بەرٸ ٶزگەرەدٸ. دارۆين ايتقانداي: "ەڭ مىقتىلار ەمەس, ەڭ جىلدام بەيٸمدەلەتٸندەر امان قالادى". بٸز جاي عانا شەشٸم قابىلداي المايمىز (جوسپارسىز. – ەسك.), 10 جىلدان سوڭ, ول سالىنعاننان كەيٸن سۋ بولماي قالسا شە?" – دەپ كٷدٸگٸمەن بٶلٸستٸ قور تٶراعاسى.
سونداي-اق, ونىڭ ايتۋىنشا, اتوم ەلەكتر ستانتسيياسى ارزانعا تٷسپەيدٸ.
"ستانتسييانىڭ قۇنى ميللياردتاعان دوللارعا باعالانادى. بۇل اتوم ەلەكتر ستانتسيياسى ٶزٸن-ٶزٸ اقتاۋى ٷشٸن تاريف قانداي بولۋى كەرەك? مەملەكەت رەتٸندە مۇنداي تاريفكە شامامىز كەلە مە? بارلىعىمىز ەلەكتر ەنەرگيياسىن پايدالانامىز, ۇيالى تەلەفونىمىزدى زاريادتايمىز, ينتەرنەتكە كٸرەمٸز, تەلەديدار كٶرەمٸز. ال ەرتەڭ اتوم ەلەكتر ستانتسيياسىن سالاتىن بولساق, وندا ەلەكتر ەنەرگيياسىنىڭ قۇنى قانشا بولادى? مۇندا بارلىق فاكتورلاردى ەسكەرۋ قاجەت. بٸز بۇل قىمبات راحاتقا دايىنبىز با, سونى ٶزٸمٸز تٷسٸنۋٸمٸز كەرەك?" - دەدٸ جاقىپوۆ.
سوعان قاراماستان قور باسشىسى ەلٸمٸزدە ەلەكتر قۋاتىنىڭ تاپشىلىعى بار ەكەنٸن, بۇل ٷشٸن بٸردەڭە ٸستەۋ كەرەكتٸگٸن مويىندادى.
