Búgin Almaty oblysynda Shamalǵan beketinde poiyz ben avtobýstyń soqtyǵysýyna qatysty is boiynsha sot úkimi shyǵaryldy, dep habarlaidy "Ult aqparat".
2019 jyly 15 qyrkúiekte Shamalǵan stantsiiasynda relstiń ústinde turyp qalǵan jolaýshylar avtobýsymen jolaýshylar poiyzy soqtyǵysty. Saldarynan avtobýs júrgizýshisi sol jerde mert bolyp, taǵy 3 adam Qarasai aýdandyq aýrýhanasynyń jansaqtaý bólimine tústi.
Atalǵan bekette kezekshi bolyp jumys isteitin D.D. Ahmedjanovqa qatysty qylmystyq is QR QK-niń 344-baby 2 bóliginde kózdelgen (jol qozǵalysy qaýipsizdigi nemese temirjol kóligin paidalaný erejelerin buzý saldarynan abaisyzda adam ólimine ákep soǵý) áreketpen saralanyp, Almaty oblysy Qarasai aýdandyq sotynyń óndirisine túsken.
«Sot jazany taǵaiyndaý kezinde stantsiia kezekshisi Ahmedjanovtyń óz kinásin moiyndap, shyn ókinýin, onyń jasyn, otbasylyq jaǵdaiyn eskere otyryp, ony 3 jyl 6 aiǵa shartty túrde sottady», - dep habarlady Qarasai aýdandyq sotynan.
Sonymen qatar, sot jábirlenýshiler E.A.Jánibekovanyń, B.M.Áýbákirdiń jáne L.A.Jarylǵasovanyń «Qazaqstan temir joly» Ulttyq kompaniiasy» Aktsionerlik qoǵamynan jáne «Qaskeleń avtobýs parki» JShS-dan moraldyq zalaldy óteý týraly azamattyq talap aryzdaryn qarady.
E.A.Jánibekovanyń paidasyna «Qazaqstan temir joly» kompaniiasynan - 5 mln teńge, «Qaskeleń avtobýs parkinen» 5 mln teńge óndirildi.
B.M.Áýbákirdiń paidasyna «Qazaqstan temir joly» kompaniiasynan - 15 mln teńge, «Qaskeleń avtobýs parkinen» 15 mln teńge óndirildi.
L.A.Jarylǵasovanyń paidasyna «Qazaqstan temir joly» kompaniiasynan 15 mln teńge óndirildi.
Sonymen birge, jábirlenýshi L.A.Jarylǵasovanyń materialdyq shyǵyndy óndirý týraly talap aryzy qanaǵattandyrylyp, onyń paidasyna stantsiia kezekshisi D.D.Ahmedjanovtan 600 myń teńge óndirilip alyndy.
Aita keteiik, osy oqiǵadan keiin Shamalǵan stantsiiasynda estakada túrinde jol ótpesin salý sheshildi. Júrginshiler kópiriniń qurylysy da bastaldy.
