Almaty qalalyq Qoǵamdyq densaýlyq saqtaý basqarmasy basshysynyń orynbasary Ásel Beisenbaeva Shamalǵanda apatqa ushyraǵan eki qyzdyń densaýlyǵy jaily aityp berdi, dep habarlaidy "Ult aqparat".
5 jáne 3 jastaǵy qyzdar búgin №2 Balalar qalalyq klinikalyq aýrýhanasynda nevrologiia bólimshesinde jatyr. Úlkeni Balalar shuǵyl kómek kórsetý ortalyǵynan - 3 qazanda, kishisi 7 qazanda aýystyryldy.
«Qazir qyzdardyń úlkeniniń jaǵdaiy ortasha, ózdiginen tamaq ishe alady, júredi, júgiredi, oinaidy, suraqtarǵa jaýap beredi, emotsiialary naqty. Iyq býynynyń oń jaq synyǵy bar, gips salynǵan. Kishi qyzda – ortalyq-júike júiesiniń zaqymdanýy saldarynan jaǵdaiy turaqty aýyr, tetraparez túrindegi qozǵalys buzylystary bar, zond arqyly tamaqtanady. 3 qazanda komadan shyqty», - dedi Ásel Beisenbaeva.
Dárigerdiń aitýynsha, balalar uzaq ońaltý sharalarynan ótedi.
«Aldaǵy ýaqytta ońaltý ortalyǵynda ońaltýdyń ekinshi kezeńi josparlanyp otyr. Balalar barlyq meditsinalyq kómekti tolyq kólemde alyp jatyr. Turaqty negizde beiindi mamandardy tarta otyryp, konsiliýmdar ótkizip kelemiz», - dedi dáriger.
Eske salaiyq, 15 qyrkúiek kúni Shamalǵan stansasyndaǵy temirjol ótkelinde poiyz ben avtobýs soqtyǵysty. Oqiǵa ornynda avtobýs júrgizýshisi mert bolyp, taǵy 3 adam Qarasai aýdandyq aýrýhanasynyń jansaqtaý bólimine tústi. Olar – anasy men 5 jáne 3 jastaǵy balalar. 22 qyrkúiek kúni sábilerdiń biri es jiǵanyn jazǵan bolatynbyz.
Atalǵan fakti boiynsha QR QK-niń 345-baby 3-bóligi boiynsha is qozǵalyp, tergeý júrip jatyr. Istiń tergelýin Bas kóliktik prokýratýra baqylaýyna aldy.
