Internet júiesiniń durys bolmaýyna bailanysty sessiia tapsyrmai qoiýǵa nemese ýaqytyn shegerýge bolmaidy. Bul týraly Ortalyq kommýnikatsiialar qyzmetinde ótken onlain brifingte QR Bilim jáne ǵylym vitse-ministri Miras Dáýlenov aitty, dep habarlaidy QazAqparat.
«Interneti joq aýylda turatyn nemese kompiýteri joq stýdentterge jataqhanada jatyp oqýǵa bolatyny týraly aqparat aldyn ala aitylǵan bolatyn. Qazirgi ýaqytta barlyq JOO-daǵy jataqhanalar shtattyq rejimde jumys isteidi. Semestrdiń basynda jataqhanalarda 15 myńǵa jýyq stýdent jatsa, qazirgi kezde 7 myń stýdent turyp jatyr. Bul – interneti joq, shalǵai aýylda turatyn stýdentter», - deidi QR Bilim jáne ǵylym vitse-ministri Miras Dáýlenov.
Sondai-aq, ol internet júiesiniń durys bolmaýyna bailanysty sessiia tapsyrmai qoiýǵa nemese ýaqytyn shegerýge bolmaitynyn aitty.
«Internetke qatysty másele bolsa jataqhanada jatyp oqýǵa bolatynyn aldyn ala eskertkenbiz, sondyqtan ony syltaý etip sessiiany keiinge shegerýge bolmaidy. Qashyqtan oqityn stýdentter úshin sessiia da qashyqtan ótedi. Kóptegen emtihan antiplagiat júiesin qoldana otyryp júzege asady. Sońǵy 5 jylda joǵary oqý oryndary antiplagiatqa qatysty ártúrli júielerdi qoldanyp keledi, sondyqtan bul stýdentter úshin jańalyq emes», - deidi ol.
