«Búgin alash jurty alǵash ret Abai kúni merekesin toilap jatyr. Ultyn súigen ulyq tulǵany taný, ony dáripteý - biz úshin basty maqsat bolýy tiis. Biylǵy mereitoi bul baǵytta keleshekte qolǵa alatyn igilikti isterdiń bastaýy dep sanaimyn», dedi QR Jazýshylar jáne jýrnalister odaǵynyń múshesi, aqyn, «Qyzylorda qoǵamdyq» teleradiokompaniiasy JShS quryltaishysy Shákizada Ábdikárimov.
Onyń aitýynsha, álemniń kóptegen elderinde ult damýynda óz orny bar tanymal tulǵalardy dáripteýge mańyz beriledi. Atap aitqanda, Reseide Esenin, Ózbekstanda Álisher Naýai shyǵarmashylyǵy keńinen nasihattalady.
«Abaidyń qazaq halqy tarihynda alatyn orny erekshe. Ulty úshin eren eńbek sińirgen tulǵa qai kezde de biz úshin alǵa bastaityn baǵdarsham ispettes. Abai bilimdi myńdy jyǵatynyn sanamyzǵa shegeledi. Qazir jan-jaǵymyzǵa baiyppen qarap kórsek, sol sózdiń ras ekendigin tolyq tanimyz. Jumyr jerde bilim men ǵylym salasy ozyq ketken memleketter sany az emes. Biz de sol biikten kórinýge umtylǵanymyz jón. Shúkir, búginde elimiz azattyqqa qol jetkizdi. Bizdiń álem jurtshylyǵy aldynda eńsemiz biik bolýy úshin qandai qadam jasaýymyz tiis? Biz sol jaiynda oilanýymyz qajet. Sonda ózgeniń aldyna túsýge, ozyq bolýǵa múmkindik bar. Bul oraida Abai qazaqtyń basty baǵdaryn aiqyndap berdi», - dedi ol.
Shákizada Ábdikárimov bul oraida Memleket basshysy Qasym-Jomart Toqaevtyń 10 tamyzdy Abai kúni retinde jariialaýy el tarihyndaǵy erekshe oqiǵa ekenin aityp ótti.
«Endigi kezekte Abai jaiynda jylma-jyl keń aýqymda nasihat jasalady. Onyń álemin túsinýge, nusqaǵan baǵdar-baǵytyn tanýǵa jol ashylady. Biz aldaǵy ýaqytta ne jasaýymyz qajet? Boiymyzda qandai jat ádetter bar? Sony talǵam tarazysyna tarta alamyz. Memleket basshysy óziniń respýblikalyq baslymdarda jariialanǵan maqalasynda «Biz básekege qabiletti memleket bolý úshin Abai murasyn esten shyǵarmaýymyz kerek. Sebebi ult retindegi jańarý ideiasy da onyń kózqarasymen úndesip jatqany anyq» dep atap kórsetti. Qazaqstan táýelsiz memleket retinde alǵa qadam basyp keledi. Endeshe, biz Abai jazǵan dúnielerdi oqi otyryp, keleshek kemerinde ult retinde qalai qalyptasa alamyz degen saýalǵa jaýap tabamyz», - dedi Sh.Ábdikárimov.
