Qaraǵandy oblysy, Shahtinsk qalasynda múgedek balalardyń ata-analary dabyl qaǵýda. Balalar jattyǵatyn damý ortalyǵy ǵimaratsyz qalýy múmkin, dep habarlaidy QazAqparat.
Kekesh, aýtizm jáne Daýn sindromy bar balalarǵa arnalǵan damý ortalyǵy bes jyldan astam ýaqyt jumys istep keledi. Onda 20-dan astam bala ainalysady. Jaqynda sabaqtar ótetin ǵimarattan aiyrylý qaýpi týyndady.
Ortalyq ieleri ǵimaratty satyp almaqshy bolǵan. Alaida bank olarǵa nesie berýden bas tartty.
«Bankter bizge nesie berýden bas tartady, óitkeni ótken jyldardaǵy tabysymyz óte az boldy. Dárigerlerdiń sanitarlyq talaptary boiynsha nysanda balalardy qabyldaýǵa shekteýler bolǵandyqtan, biz sabaqtardy júrgize almadyq», - deidi damý ortalyǵynyń jetekshisi Elena Ratashýk.
Bul jaǵdai týraly bilgen soń, ortalyqqa kelgen balalardyń ata-analary dabyl qaǵa bastaǵan. Olar qala biliginen úi-jai máselesin sheshýdi ótinýde.
Shahtinsk qalasynyń bilim berý bóliminde balalar kóshede qalmaidy, olardy memlekettik balabaqshalar qabyldaidy dep sendirdi. Erekshe qajettilikteri bar balalar úshin onda 200-den astam oryn bar. Sondai-aq, bilim bólimi memlekettik tapsyrys boiynsha 75 balaǵa qarajat bólýge daiyn ekenderin jetkizdi. Alaida ortalyqqa qoiylyp otyrǵan mindetti shart – sabaqtardy ótkizý úshin ǵimarattyń bolýy.
«Kásipker aiyna 4 mln teńgege deiin alady. Tiisinshe, memleket osy bilim berý uiymyna qarajat bólý úshin olardyń materialdyq-tehnikalyq bazasy qurylýy kerek degen talap qoiady. Óńirde bos ǵimarattar bar», - deidi Qalalyq bilim bóliminiń basshysy Nikolai Onsovich.
