Foto: pxhere
Bas memlekettik eńbek inspektory Tólegen Ospanqulov "Qazaqstan" shahtasyndaǵy órtten qaza tapqan kenshilerdiń otbasyna qandai kómek kórsetiletinin aitty, dep habarlaidy Sputnik Qazaqstan.
"Bul mekemede jumysshy men jumys berýshiniń arasynda 2022-2024 jyldarǵa arnalǵan ujymdyq eńbek sharty bar. Sol ujymdyq eńbek sharty boiynsha qaitys bolǵan adamdardyń otbasyna 10 jyldyq jalaqysy tólenedi. Qaiǵyly jaǵdaida qaza bolǵandardyń otbasyna páter beriledi, balalarynyń oqýǵa túsýine jaǵdai jasalady", - dedi Ospanqulov shahtadaǵy apat boiynsha ótken brifingte.
Sondai-aq órtten zardap shekken shahterlerge de kómek kórsetiledi.
"Olardyń syrqattanýyna bailanysty járdemaqy 100 paiyz tólenedi. Saýyǵyp shyqqanǵa deiin emdeý shyǵyndaryn kompaniia tolyǵymen óz moinyna alady. Eger odan keiin jazylmai, múgedek bolyp qalsa, onda áleýmettik kómek kórsetiledi", - dedi ol.
Eske salsaq, 17 tamyz saǵat 10.05-te "Qazaqstan" shahtasynda konveier lentasy órtendi. TJ kezinde jer astynda 227 bolǵan, 222 kenshi qutqaryldy. Eki adamnyń denesi tabyldy, taǵy úsheýi izdestirilip jatyr.
Zardap shekken 11 kenshi qazir aýrýhanada em qabyldap jatyr.
Qylmystyq kodekstiń 277-baby 3-tarmaǵy "Taý-ken nemese qurylys jumystaryn júrgizý kezinde qaýipsizdik erejelerin buzý" boiynsha qylmystyq is tirkeldi.
