فوتو: pxhere
باس مەملەكەتتٸك ەڭبەك ينسپەكتورى تٶلەگەن وسپانقۇلوۆ "قازاقستان" شاحتاسىنداعى ٶرتتەن قازا تاپقان كەنشٸلەردٸڭ وتباسىنا قانداي كٶمەك كٶرسەتٸلەتٸنٸن ايتتى, دەپ حابارلايدى Sputnik قازاقستان.
"بۇل مەكەمەدە جۇمىسشى مەن جۇمىس بەرۋشٸنٸڭ اراسىندا 2022-2024 جىلدارعا ارنالعان ۇجىمدىق ەڭبەك شارتى بار. سول ۇجىمدىق ەڭبەك شارتى بويىنشا قايتىس بولعان ادامداردىڭ وتباسىنا 10 جىلدىق جالاقىسى تٶلەنەدٸ. قايعىلى جاعدايدا قازا بولعانداردىڭ وتباسىنا پەتەر بەرٸلەدٸ, بالالارىنىڭ وقۋعا تٷسۋٸنە جاعداي جاسالادى", - دەدٸ وسپانقۇلوۆ شاحتاداعى اپات بويىنشا ٶتكەن بريفينگتە.
سونداي-اق ٶرتتەن زارداپ شەككەن شاحتەرلەرگە دە كٶمەك كٶرسەتٸلەدٸ.
"ولاردىڭ سىرقاتتانۋىنا بايلانىستى جەردەماقى 100 پايىز تٶلەنەدٸ. ساۋىعىپ شىققانعا دەيٸن ەمدەۋ شىعىندارىن كومپانييا تولىعىمەن ٶز موينىنا الادى. ەگەر ودان كەيٸن جازىلماي, مٷگەدەك بولىپ قالسا, وندا ەلەۋمەتتٸك كٶمەك كٶرسەتٸلەدٸ", - دەدٸ ول.
ەسكە سالساق, 17 تامىز ساعات 10.05-تە "قازاقستان" شاحتاسىندا كونۆەيەر لەنتاسى ٶرتەندٸ. تج كەزٸندە جەر استىندا 227 بولعان, 222 كەنشٸ قۇتقارىلدى. ەكٸ ادامنىڭ دەنەسٸ تابىلدى, تاعى ٷشەۋٸ ٸزدەستٸرٸلٸپ جاتىر.
زارداپ شەككەن 11 كەنشٸ قازٸر اۋرۋحانادا ەم قابىلداپ جاتىر.
قىلمىستىق كودەكستٸڭ 277-بابى 3-تارماعى "تاۋ-كەن نەمەسە قۇرىلىس جۇمىستارىن جٷرگٸزۋ كەزٸندە قاۋٸپسٸزدٸك ەرەجەلەرٸن بۇزۋ" بويىنشا قىلمىستىق ٸس تٸركەلدٸ.
