Foto: Tengrinews.kz/Turar Qazanǵapov
Búgin "Arselor Mittal Temirtaý" kompaniiasyna qarasty Lenin shahtasynda tótenshe jaǵdai boldy. Metan jarylyp, arty órtke ulasqan. Apat saldarynan bes kenshi qaza tapty.
Qaraǵandy oblysynyń ákimi Jeńis Qasymbek shahtada qaza tapqan kenshilerdiń otbasylaryna qandai materialdyq kómek kórsetiletinin aitty, dep habarlaidy "Ult aqparat".
"Zardap shekkenderge barlyq qajetti meditsinalyq kómek, al olardyń otbasylaryna psihologiialyq qoldaý kórsetilip jatyr. Ákimdik barlyq kómekti kórsetýge daiyn.
Budan bólek, ujymdyq kelisimshartqa sáikes, olarǵa 10 jyldyq eńbekaqy kóleminde materialdyq kómek kórsetilip, nesieleri jabylady jáne balalardy oqytý shyǵyndary óteledi. Sonymen qatar, biyldan bastap ujymdyq kelisimshartqa qaza tapqandardyń otbasylaryna baspana satyp alý týraly tarmaq engizildi.
Jalpy, materialdyq jáne qarjylai kómek tolyǵymen kórsetiledi", - dedi Qasymbek óńirlik kommýnikatsiialar qyzmetinde ótken brifingte.
