28 jeltoqsan kúni Polsha astanasynda jyldam shahmattan (rapid) FIDE-niń álem chempionaty aiaqtaldy. Chempionat qorytyndysy boiynsha, 17 jastaǵy qazaqstandyq shahmatshy Bibisara Asaýbaeva ekinshi oryn ielenip, kúmis júldeger atandy, dep habarlaidy QazAqparat Qazaqstannyń shahmat federatsiiasyna silteme jasap.
Sheshýshi partiialarda Bibisara Grýziianyń tájiribeli shahmatshysy – grossmeister Nana Dzagnidzeni, otandasy Ásel Serikbaidy utyp, álem chempionatynyń jeńimpazy – halyqaralyq grossmeiter Aleksandra Kosteniýkpen oiyndy teń aiaqtaǵan.
Biyl Asaýbaeva áielder arasynda onlain ótken Aziia chempionatynda jeńimpaz atandy, Qazaqstan Respýblikasy quramasynda oinap, Búkilálemdik shahmattan onlain olimpiadada úzdik 8 komandanyń qataryna kirgen, kóptegen halyqaralyq jarystarda júldeli oryndarǵa ie bolǵan.
Al Qyzylorda oblysynyń ókili, áielder arasynda halyqaralyq sheber Ásel Serikbaidyń jeńiske jetýine sál ǵana sáttilik jetpedi. Chempionat boiy Ásel kóshbasshylar qatarynda bolyp, Katerina Lagno jáne Aleksandra Kosteniýk siiaqty álemniń jetekshi shahmatshylarymen teń oiyn júrgizgen.
Búgin blitsten shahmat chempionaty bastalyp, 30 jeltoqsanda aiaqtalady. Jarysqa Qazaqstannan 7 shahmatshy qatysady.
