Qazaqstan shahmat federatsiiasynyń vitse-prezidenti Dármen Sádýaqasov jýrnalistermen kezdesý barysynda Bibisara Asaýbaevanyń málimdemesine jaýap berdi, dep habarlaidy QazAqparat.
«Daý kútpegen jerden shyqty. Buǵan deiin men ol málimdemeniń shyndyqqa janaspaitynyn aitqan bolatynmyn. Eń bastysy, biz Bibisarany, onyń zor talanty men áleýetin joǵary baǵalaimyz. Janjal neden týdy? «Qyzdardy prezidentke aqsha suraý úshin aparǵan» degen málimdeme taraǵan. Biraq biz sizderge damý tujyrymdamasyn kórsettik, bul - Memleket basshysyna usynǵan qujat. Onda aqsha týraly eshteńe joq, eshqandai soma aitylmaǵan. Biz shahmatty damytýdyń tujyrymdamasy men tásilderi týraly aittyq», - dedi Dármen Sádýaqasov jýrnalistermen kezdesýde.
Onyń aitýynsha, shahmat federatsiiasy katalizator, ol memlekettik biýdjetti basqarmaidy.
«Eger qarjy bólinetin bolsa, ol ministrlik, ákimdik arqyly shahmat sektsiialary men úiirmeler ashýǵa, sportshylardy qarjylandyrýǵa jumsalady. Federatsiia shahmatty buqaralyq sport, joǵary jetistikter sporty turǵysynan qalai damytý kerektigi týraly kásibi pikir bildiredi», - dedi spiker.
Sonymen qatar, ol Bibisaranyń nelikten mundai málimdeme jasaǵanyna da jaýap berdi.
«Biz Bibisaranyń anasy tarapynan qyzǵanysh bolýy múmkin dep oilaimyz. Bul jazbany Bibisaranyń ózi emes, anasy jazǵan bolýy múmkin. Bul - bizdiń ustanymymyz. Múmkin olai emes shyǵar», - dedi federatsiia vitse-prezidenti.
Sonymen qatar Dármen Sádýaqasov federatsiiada sportshylardy qarjylandyrýda teńgerimsizdik bar ekenin aitty. Onyń pikirinshe, bul durys emes.
Buǵan deiin Bibisara Asaýbaeva óziniń Instagram paraqshasynda shahmat federatsiiasy tanymal sportshylardy Prezident ákimshiliginen úsh milliard teńge suratý úshin paidalandy dep jazǵan bolatyn.
