قازاقستان شاحمات فەدەراتسيياسىنىڭ ۆيتسە-پرەزيدەنتٸ دەرمەن سەدۋاقاسوۆ جۋرناليستەرمەن كەزدەسۋ بارىسىندا بيبٸسارا اساۋباەۆانىڭ مەلٸمدەمەسٸنە جاۋاپ بەردٸ, دەپ حابارلايدى قازاقپارات.
«داۋ كٷتپەگەن جەردەن شىقتى. بۇعان دەيٸن مەن ول مەلٸمدەمەنٸڭ شىندىققا جاناسپايتىنىن ايتقان بولاتىنمىن. ەڭ باستىسى, بٸز بيبٸسارانى, ونىڭ زور تالانتى مەن ەلەۋەتٸن جوعارى باعالايمىز. جانجال نەدەن تۋدى? «قىزداردى پرەزيدەنتكە اقشا سۇراۋ ٷشٸن اپارعان» دەگەن مەلٸمدەمە تاراعان. بٸراق بٸز سٸزدەرگە دامۋ تۇجىرىمداماسىن كٶرسەتتٸك, بۇل - مەملەكەت باسشىسىنا ۇسىنعان قۇجات. وندا اقشا تۋرالى ەشتەڭە جوق, ەشقانداي سوما ايتىلماعان. بٸز شاحماتتى دامىتۋدىڭ تۇجىرىمداماسى مەن تەسٸلدەرٸ تۋرالى ايتتىق», - دەدٸ دەرمەن سەدۋاقاسوۆ جۋرناليستەرمەن كەزدەسۋدە.
ونىڭ ايتۋىنشا, شاحمات فەدەراتسيياسى كاتاليزاتور, ول مەملەكەتتٸك بيۋدجەتتٸ باسقارمايدى.
«ەگەر قارجى بٶلٸنەتٸن بولسا, ول مينيسترلٸك, ەكٸمدٸك ارقىلى شاحمات سەكتسييالارى مەن ٷيٸرمەلەر اشۋعا, سپورتشىلاردى قارجىلاندىرۋعا جۇمسالادى. فەدەراتسييا شاحماتتى بۇقارالىق سپورت, جوعارى جەتٸستٸكتەر سپورتى تۇرعىسىنان قالاي دامىتۋ كەرەكتٸگٸ تۋرالى كەسٸبي پٸكٸر بٸلدٸرەدٸ», - دەدٸ سپيكەر.
سونىمەن قاتار, ول بيبٸسارانىڭ نەلٸكتەن مۇنداي مەلٸمدەمە جاساعانىنا دا جاۋاپ بەردٸ.
«بٸز بيبٸسارانىڭ اناسى تاراپىنان قىزعانىش بولۋى مٷمكٸن دەپ ويلايمىز. بۇل جازبانى بيبٸسارانىڭ ٶزٸ ەمەس, اناسى جازعان بولۋى مٷمكٸن. بۇل - بٸزدٸڭ ۇستانىمىمىز. مٷمكٸن ولاي ەمەس شىعار», - دەدٸ فەدەراتسييا ۆيتسە-پرەزيدەنتٸ.
سونىمەن قاتار دەرمەن سەدۋاقاسوۆ فەدەراتسييادا سپورتشىلاردى قارجىلاندىرۋدا تەڭگەرٸمسٸزدٸك بار ەكەنٸن ايتتى. ونىڭ پٸكٸرٸنشە, بۇل دۇرىس ەمەس.
بۇعان دەيٸن بيبٸسارا اساۋباەۆا ٶزٸنٸڭ Instagram پاراقشاسىندا شاحمات فەدەراتسيياسى تانىمال سپورتشىلاردى پرەزيدەنت ەكٸمشٸلٸگٸنەن ٷش ميلليارد تەڭگە سۇراتۋ ٷشٸن پايدالاندى دەپ جازعان بولاتىن.
