“Muha, bizdi bastańyz. Endi aianatyn eshteńe qalǵan joq. Sońyńyzdan erdik”, – desken jastar kún saiyn top-top bop, jumysyma kele bastady. Olar tipti basyma tóne bastaǵan qaýip-qaterdi de aldyn ala eskerip, maǵan bildirtpei, “Shahanovty qorǵaityn top” degen jasyryn uiym qurypty. Buryn saiasatqa aralaspaǵan deni taza, kózqarasy aiqyn, tileýles, rýhtas adamyna qoń etin oiyp berýge ázir turatyn mundai jańa tolqynnyń bel alyp, bilek qosqany kóńilime edáýir úmit uialatty.
Bir kúni túnde úsh-tórt saǵat qaǵazǵa shuqshiyp otyrǵandyqtan, on-on bes minýt boi jazyp keleiin dep syrtqa shyqsam, arqamnan esik aldynda turǵan eki jigit ilese júrdi. Ońǵa burylsam – ońǵa, solǵa burylsam – solǵa, toqtasam – toqtaidy. Kóńilime yńǵaisyz kúdik endi. Jurt ary-beri júrip jatqan, elektr jaryǵy bar jerge shyǵyp, álgilerden qalai qutylýdyń jolyn oilap turǵanymda, olar qasyma kelip, qol berip amandasty da: “Bizden qaýiptenbeńiz. Biz sizdiń qoǵamdyq qorǵaýshylaryńyzbyz”, – dedi.
– Eger keibir túnderi syrtqa, serýenge shyqpai, úiimde uiyqtap jatsam da sender meni esik aldynda kúzetip tura beresińder me? – dep suraǵanymda, álgi jigitterdiń biri:
– Biz úlken toppyz. Kezektesip kúzetemiz. Sizdiń aman-saý júrýińiz ult úshin qajet, – dedi.
Az-kem únsizdikten soń ekinshi jigit qasyma kelip:
– Aǵa, quttyqtaimyz. Esittińiz be, esitpedińiz be? Búgin siz sportsmenderdiń úlken jiynynda Respýblika kikboksingteriniń prezidenti bop sailandyńyz! – dep qolymdy qysty.
– Túsinbedim, bul ázilderiń be, shyndaryń ba? – dedim men tańdanyp.
– Men ómirimde bir kún sportpen shuǵyldanbaǵan pendemin. Baiqaýsyzda bireý sál iterip jiberse qulaǵaly turǵan adam qalai respýblika kikboksinginiń prezidenti bola alady? Bularyń anekdottyń anekdoty ǵoi...
– Biz sizdiń sportpen shuǵyldanbaǵanyńyzdy da, qara kúsh jaǵynan tym álsiz ekenińizdi de jaqsy bilemiz, – dedi álgi jigit jymiyp. – Biraq, siz elimizdegi rýhy kúshti sanaýly adamdardyń birisiz. Sol úshin de biliktegi keibireýler sizdiń kózińizdi joiǵysy keledi. Qazirgi tańda Jeltoqsan shyndyǵyn ashýda sizden batyl, sizden yńǵaily adam joqtyń qasy. Mine, sondyqtan da, Shahanov jalǵyz emes, ol – respýblika kikboksingtarynyń prezidenti, onyń arqasynda qaptaǵan kúsh ieleri tur. “Kim de kim oǵan qarsy qol kóterer bolsa úlken qasiretke jolyǵady” degen oidy sezdirý úshin biz sizdi kikboksingterdiń prezidenti etip syrtyńyzdan sailap jiberdik. Mundai erkindigimizge sizden keshirim suraimyz. Biraq, bul ideiany usynǵan inińiz, belgili kikboksing chempiony – Sabyrjan Mahmetov. Ol erteń sizge ózi baryp jolyǵady.
O toba, oiym túgili túsime kirmegen, osyndai kútpegen oqiǵaǵa jolyǵamyn dep kim oilaǵan.
Muhtar Shahanovtyń feisbýktaǵy jazbasynan
.jpg)