- Qaraǵandy oblysynyń Shahan kentinde qiraǵan turǵyn úige qatysty qylmystyq is qozǵaldy, dep habarlaidy «QazAqparat» HAA tilshisi oqiǵa ornynan.
«TJ deregine qatysty material QR QK-niń 292-babynyń 3 tarmaǵy (Adam ólimine ákep soqtyrǵan órt qaýipsizdigi talaptaryn buzý) boiynsha sotqa deiingi tergeý jumystarynyń tizilimine tirkeldi», - dep habarlady Qaraǵandy oblystyq IID baspasóz qyzmeti.
Buǵan deiin habarlanǵandai, úiindi astynan 9 kóz jumǵan adamnyń denesi arshyp alyndy. Onyń úsheýi er adam, úsheýi áiel, úsheýi bala. Balanyń bireýi 2016 jylǵy, ekinshisi 2010 jylǵy.
«Turǵyn úi qazandyqtyń jarylýynan qulaǵan. Shahandaǵy birqatar turǵyn úilerge jylý avtonomdyq júie arqyly beriledi. Bul qazandyq úi komitetiniń esebinde boldy», - dep málim etti oblys ákimi Nurmuhambet Ábdibekov jýrnalisterge bergen suhbatynda. Ol tótenshe jaǵdaidyń saldaryn joiý jáne sebebin anyqtaý boiynsha oblystyq komissiia qurylǵanyn jariialady.
Ákimniń aitýynsha, respýblikalyq komissiia qurý josparlanýda. TJ ornynda izdeý-qutqarý jumystary jalǵastyrylýda. «Mindetimiz adamdardy anyqtaý úshin úiindilerdi tazalaý jumystaryn aiaqtaý», - dep atap ótti óńir basshysy. Ázirge, bir adam úiindi astynda qalyp qoiǵan.
Ázirge belgilisi, bul kópqabatty úide 118 turǵyn mekendegen, al TJ oryn alǵan kezde qulaǵan bólikte shamamen 30 adam bolǵan. Turǵyndardyń kóbisin týystary syrtqa shyǵaryp úlgergen. Sonymen qatar, baspanasyz qalǵandarǵa balabaqshanyń ǵimaratynda turýǵa múmkindik berildi.
Saǵat 8:12-de qiraǵan úiindiniń astynan tiri qalǵan 32 jastaǵy er adam qutqaryldy.
Úiindilerdi tazartýǵa 280 adam jumyldyrylǵan, olardyń qatarynda qutqarýshylar, politsiia qyzmetkerleri, jergilikti atqarýshy organdar, jedel meditsinalyq járdem brigadasy, Ulttyq ulannyń 52859 áskeri bóliminiń aýyr tehnikasy jáne jeke kásipkerler bar.
Sonymen qatar, Qaraǵandy oblysy Shahtinsk qalasyna qarasty Shahan kentindegi turǵyn úidiń qulaý oqiǵasyna qatysty Shahan kenti ákimdigi qasynan shuǵyl jeli ashyldy: 8 (72156) 3-24-17.
Eske sala keteiik, 1 qańtar kúni 22:40-ta Qaraǵandy oblysy TJD qutqarý bólimine Shahtinsk qalasy Shahan aýylyndaǵy kópqabatty úidiń bir bóligi opyrylyp túskeni týraly qońyraý shalynǵan. Oqiǵa ornyna shuǵyl túrde TJD qutqarýshylary jóneltilip, turǵyndar evakýatsiialandy. Áýeli 1 adamnyń máiiti úiindi astynan shyǵarylǵan bolatyn. Keiin ekinshi turǵynnyń denesi úiindi astynan tabyldy.
