Elordadaǵy qazaqtyń birqatar belsendi azamaty Shaxandaǵy apattan zardap shekkenderge kiim-keshek jáne buzylmaityn azyq-túlik jinaý sharasyn bastady. Bul jaiynda kúni keshe belgili aqyn ári jýrnalist, QR Qorǵanys jáne aeroǵarysh ministriniń baspasóz xatshysy Aqberen Elgezek óziniń Feisbýktaǵy paraqshasynda jazdy, - dep habarlaidy "Ult aqparat".
«Qadirli astanalyqtar! Shaxan eldi-mekeninde bolǵan apat barshamyzdyń kóńil-kúiimizdi alai-dúlei qyldy. Keshe ǵana jańa jyldy qarsy alǵan 9 adam qaza bolyp, qanshama otbasy baspanasyz qaldy. Osyǵan orai Erlan Saiyrov myrza bastaǵan bir top astanalyq belsendi azamat Shaxtinskidegi apattan zardap shekkenderge kiim-keshek jáne buzylmaityn azyq-túlik jinaý sharasyn bastap jatyr. Qiyn jaǵdaida qalǵan aǵaiynǵa kómekteskisi kelgen astanalyqtar 3 qańtardan bastap, saǵat 10:00-15:00 ýaqyt aralyǵynda Momyshuly men Sátbaev kósheleriniń qiylysynda ornalasqan «Belyi veter» dúkeniniń sol jaǵyndaǵy kireberiste, 3-shi qabattaǵy ofiske zattardy ótkize alady. Esik ashyq turady. Shara aptanyń juma kúnine deiin jalǵasyp, jinalǵan dúnie senbi kúni apat bolǵan eldi mekenge jóneltiledi», - dep jazdy ol.
Igi istiń basy-qasynda júrgen azamattardyń qatarynda: Erlan Sairov, Aqberen Elgezek, Murat Ábenov, Dina Elgezek sekildi elge tanymal qoǵam qairatkerleri men belsendiler bar.
Álem jelide #ShahanKómek heshtegimen taraǵan gýmanitarlyq shara áli de jalǵasyn tabýda. Basty maqsat - osyndai aýyr jaǵdaidy basynan ótkergen Shahan turǵyndaryna el bolyp jumylyp qoldan kelgen kómekti kórsetý hám sol arqyly birligimiz synalǵan tusta óz myqtylyǵymyzdy tanytý.
Aita keterligi, «Belyi veter» dúkeni «Turan» meiramhanasynyń janynda, «Raxmet» saýda úiiniń qarama-qarsysynda, Momyshuly atyndaǵy dańǵyldyń boiynda ornalasqan.
Bailanys telefondary mynadai: 87770411470; 87017074010
Ult portaly
