Koronavirýstyń taralýyna qatysty daǵdarysty eńserýde Qazaqstan shaǵyn jáne orta biznesti qoldaýǵa ekpin qoidy. Bul týraly QR Ulttyq ekonomika birinshi vitse-ministri Timýr Jaqsylyqov aitty, dep habarlaidy QazAqparat.
«Daǵdarys barlyq salany qamtyp, ekonomikalyq ósimniń túrli aspektilerine tosqaýyl boldy. Barsha álem tiisti deńgeide turaqtylyqty saqtaýǵa tyrysty. Bastapqy kúsh-jiger infektsiianyń taralaýy múmkindigine tosqaýyl qoiýǵa shoǵyrlandy. Birinshi kezeńde indettiń taralýyn shekteý turǵysynda nashar nátije kórsetken elder ekinshi kezeńde vaktsinalaýdyń arqasynda jaqsy kórsetkishterdi baiqatty. Qazaqstandaǵy jaǵdai qandai? Árine, vaktsinalaý qarqyn alyp kele jatqany belgili. Úkimet kúzge qarai josparlanǵan kórsetkishterge qol jetkizip, osy arqyly infektsiianyń taralýyn shekteýdi eskerip otyr. Ekonomikalyq kúsh-jiger salasynda shaǵyn jáne orta bizneske negizdelgen qadamdar eleýli róldi baiqatty. Sebebi shaǵyn jáne orta bizneske aýyrtpalyq joǵary bolady. Eger ózge elderdiń tájiribesine qarasaq, olar da osyǵan asa kóńil bóldi», - dedi T. Jaqsylyqov «Astana FINANCE DAYS 2021 konferentsiiasy aiasyndaǵy sessiia jumysynda.
Onyń aitýynsha, Qazaqstan da óziniń kúsh-jigeriniń eleýli úlesin atalǵan sektordy qoldaýǵa baǵyttady.
«Qazirgi kezde bizde ońtaily nátijeni kórip turmyz. Shaǵyn jáne orta biznestiń ónim shyǵarýy qysqarmady. Belsendi kásiporyndar sany azaimaidy. Qyzmet kórsetý salasyna bailanysty ekonomika segmentinde qysqarý boldy. Bárinen buryn saýda, qoǵamdyq tamaqtaný sektory zardap shekti. Degenmen vaktsinalaý qarqyny ilgerilegen saiyn ahýaldyń jaqsarýy jalǵasady degen oidamyz», - dedi vitse-ministr.
Onyń paiymynsha, shaǵyn jáne orta biznesti qoldaýǵa erekshe nazar aýdarý kerek, iaǵni ekonomikada jumys oryndaryn saqtaý maqsatyndaǵy daǵdarysqa qarsy qoldaý qadamdary mańyzdy. Sonymen qatar, densaýlyq saqtaý júiesine aldaǵy ýaqytta kóp kóńil bólgen jón.
