Shaǵyn qala men aýyl dárigeriniń jalaqysyn teńestirý qajet. Mundai usynysty búgin QR Parlamenti Senatynda ótken jergilikti ókildik organdarmen ózara is-qimyl jónindegi keńes otyrysynda senator Erik Sultanov jasady, dep habarlaidy QazAqparat tilshisi
«Shaǵyn qalalarda problemalar bar. Ol jaqta biýdjettik sala qyzmetkerleri aýyldyq jerlerdegi qyzmetkerlerden 25 paiyzǵa tómen jalaqy alady. Biraq, shaǵyn qalalardaǵy eńbek jáne ómir súrý jaǵdailarynyń aýyldyq jerden aiyrmashylyǵy joq. Búginde Soltústik Qazaqstan oblysynyń birqatar qalasynda, menińshe, kóptegen oblystarda dáriger tapshylyǵy syndy úlken problema bar. Óitkeni, jalaqy aiyrmashylyǵy 25 paiyzdy quraidy. Dárigerler aýdan ortalyǵynda jumys isteýden bas tartyp, 5 shaqyrym jerdegi aýylǵa barady. SQO-da mundai 4 qala bar», - dedi senator.
Onyń atap ótýinshe, bul probelmany sheshý qajet jáne oǵan aitarlyqtai mol qarajat qajet emes.
Al QR Eńbek jáne halyqty áleýmettik qorǵaý vitse-ministri Svetlana Jaqypovanyń aitýynsha, qazirgi ýaqytta shaǵyn qalalardaǵy dárigerlerdiń de jalaqysyna ústemeaqy qosý máselesi qarastyrylyp jatqanyn aitty.
«Shyndyǵynda da aýyldyq jerlerdegi qyzmetkerlerdiń úlken artyqshylyǵy bar. Olarǵa 25 paiyz ústemeaqy bólinedi. Buǵan qosa, jergilikti atqarýshy organdar otyn satyp alýlaryna nemese kommýnaldyq qyzmetterdi tóleýine áleýmettik qoldaý kórsetip otyrady. Búginde dál osy normany shaǵyn qalalar úshin qaralyp jatyr», - dedi Svetlana Jaqypova.
