Kásipkerler úshin ákimshilik júkteme tómendetildi. Bul týraly QR Ulttyq ekonomika ministri Rýslan Dálenov málim etti, dep habarlaidy QazAqparat.
«2020 jylǵy 1 qańtardan bastap mikro jáne shaǵyn bizneske qatysty tekserýlerdi júrgizýge úsh jyldyq moratorii qoldanylady. 100 myńǵa jýyq tekserý júrgizilmeidi. Bul ákimshilik júktemeni azaitýǵa múmkindik berip, biznes júrgizýdegi turaqtylyqqa yqpal etedi», - dedi Dálenov juma kúni parlamenttik tyńdaýda.
Ulttyq ekonomika ministri atap ótkendei, basqa da salyqtyq tekserýler 1 maýsymǵa deiin toqtatyldy.
«Bizneske arnalǵan úkimet» onlain-platformasy negizinde memleket pen biznestiń ózara is-qimylynyń jańa formaty iske qosyldy. Eki júzge jýyq memlekettik qyzmet pen memlekettik qoldaý sharasy usynylady. Óz biznesin damytý máselesi boiynsha qyzmetterdiń barlyq spektrin onlain-rejimde paidalanýǵa bolady.
11 óńirde tolyq formatty oflain keńseler jumys isteidi.
Ministrdiń aitýynsha, 2021 jylǵa qarai bizneske arnalǵan barlyq qyzmetterdi onlain-platformada tolyq integratsiialaýdy qamtamasyz etý jáne alty óńirde oflain keńselerdi iske qosý josparlanýda. Bul biznestiń barlyq qyzmetin elektrondy tolyq qamtýdy qamtamasyz etedi.
Biyl biznes-ahýaldy jaqsartýǵa baǵyttalǵan reformalardyń 8-shi paketi qabyldandy. Birqatar qyzmetter elektrondy formatqa aýystyryldy, jyljymaityn múlik mámileleriniń qaýipsizdigi arttyryldy, qurylys kezindegi birqatar talap alynyp tastaldy.
«Biyl biznespen keri bailanys kúsheitildi. Osy kezeńde bul mańyzdy. Kásipkerler tarapynan kelip túsetin máseleler turaqty negizde qaralady», - dedi Rýslan Dálenov.
