Akademik E.Bóketov atyndaǵy Qaraǵandy memlekettik ýniversitetinde aqyn, jazýshy, qoǵam jáne memleket qairatkeri Sáken Seifýllinniń 125 jyldyǵyna arnalǵan «Sáken Seifýllin: ulttyq rýh jáne urpaqtar sabaqtastyǵy» atty halyqaralyq ǵylymi-praktikalyq konferentsiia ótti.
Alqaly jiynǵa Qaraǵandy oblysynyń ákimi Jeńis Qasymbek, qoǵam jáne memleket qairatkeri Oralbai Ábdikárimov, aqyn, Qazaqstan Jazýshylar odaǵynyń tóraǵasy Ulyqbek Esdáýlet, «TÚRKSOI» Túrki mádenieti men ónerin damytý jónindegi halyqaralyq uiymnyń bas hatshysy Dúisen Qaseiinov, Ulttyq Ǵylym akademiiasynyń akademigi Hangeldi Ábjanov, ál-Farabi atyndaǵy Qazaq ulttyq ýniversitetiniń professory Kúlásh Ahmet, sondai-aq belgili lingvister, ádebiettanýshylar, tarihshylar, halyqaralyq uiymdardyń basshylary, JOO oqytýshylary, magistranttar men stýdentter qatysty.
Konferentsiia barysynda «Úsh arys» kitap-albomy men «Sáken Seifýllin – memlekettik tulǵa» atty kitaptyń tusaýkeser rásimi uiymdastyryldy. Alǵashqy atalǵan eńbek Sáken Seifýllinniń, Iliias Jansúgirovtiń jáne Beiimbet Mailinniń 125 jyldyǵyna arnalǵan. Kitap-albom «TÚRKSOI» halyqaralyq uiymynyń tapsyrysy boiynsha qazaq jáne orys tilderinde jaryqqa shyqqan.
– Bizdiń uiymnyń basty maqsaty – túrki halyqtarynyń ortaq mádeni murasyn álemdik arenaǵa shyǵarý. Úsh jazýshymyzdyń shyǵarmashylyǵyn sýretter men shyǵarmalary arqyly kórsetý úshin kitap-albom shyǵarýǵa sheshim qabyldadyq, – dedi «TÚRKSOI» Túrki mádenieti men ónerin damytý jónindegi halyqaralyq uiymnyń bas hatshysy Dúisen Qaseiinov.
Al Hangeldi Ábjanov, Serik Ospanov jáne Temirǵali Arshabekov birigip jazǵan «Sáken Seifýllin – memlekettik tulǵa» Qaraǵandy oblystyq mádeniet, muraǵattar jáne qujattama basqarmasynyń bastamasymen jaryq kórdi.
Bul eńbekte Omby arhivinen jáne Almatydaǵy Prezidenttik muraǵattan alynǵan materialdardy keńinen paidalanǵan avtorlar Sáken Seifýllinniń tulǵasyn memleket qairatkeri retinde kórsetýge tyrysqan.
Jalpy, atalǵan konferentsiia materialdarynyń jinaǵyna kelip túsken 120 ǵylymi maqalanyń ishinen 95 jumys iriktelip alynypty. Sektsiialyq otyrystarda qatysýshylar «Sáken Seifýllinniń memleket jáne qoǵam qairatkeri retindegi tarihi beinesi», «Jahandaný dáýirindegi til biliminiń ózekti máseleleri» jáne «Qazaq ádebietiniń damý tarihy: keshe jáne búgin» atty taqyryptarda pikir almasty.
Konferentsiia aiasynda Sáken Seifýllinniń jeke zattarynyń, sondai-aq murajai eksponattary men kitaptarynyń, muraǵat materialdarynyń kórmesi uiymdastyryldy.
