Saiasattanýshy, QR Eńbek sińirgen qairatkeri, Ulttyq qoǵamdyq senim keńesiniń múshesi Seidahmet Quttyqadam búgingi Ulttyq qoǵamdyq senim keńesiniń alǵashqy otyrysy týraly pikirin bildirdi, dep habarlaidy QazAqparat.
«Ár qoǵamnyń, ár halyqtyń aldyna osyndai tarihi kezeńder keledi. Mundai jiyn kúnde bolmaidy. Osyndai tarihi múmkindik búgin bizge týyp tur. Sebebi, baiqasańyz sózdiń baǵyty basqasha: maqtaý da, madaqtaý da joq. Tek sharýa máseleleri talqylanyp jatyr. Sodan keiin Prezidenttiń ózi ózgeristerdi qozǵap otyr. Meniń oiymsha, osy múmkindikti qur jibermeýimiz kerek. Tarihty qarasańyz, qansha jyl boiy qinalǵan jurtpyz. Patshanyń bodanynda boldyq. Keiin sovettik kezeńde ómir súrdik. Al qazir ózimizdiń táýelsiz elimizde talanttar qainap jatyr. Ár salada joldary ashylmai júrgender bar. Solardy iske jumyldyra bilsek, keremet ózgerister bolady», - dedi Seidahmet Quttyqadam.
Ulttyq qoǵamdyq senim keńesiniń múshesiniń aitýyna qaraǵanda, búgingi usynystar boiynsha nátije bolady.
«Biraq, menińshe, asyǵýǵa bolmaidy. Bul bir kúnde nemese bir túnde ózgeretin nárse emes. Qansha jyl boiy jinalǵan problemalardy tez sheshý múmkin emes. Degenmen, satylap, baiyptap, máselelerdiń bárin sheshýge bolady. Keibir azamattarymyz peiishti bir kúnde ornatpaq. Ol bolmaidy. Daiyndyq kerek», - dedi ol.
Eske sala ketsek, búgin elordada Ulttyq qoǵamdyq senim keńesiniń alǵashqy otyrysy ótti. Otyrysqa Qazaqstan Prezidenti Qasym-Jomart Toqaev qatysty.
Ulttyq keńestiń quramy belgili memleket jáne qoǵam qairatkerleriniń, saiasi partiialar, úkimettik emes sektor ókilderiniń qatarynan qalyptastyrylady.
Qazaqstan Respýblikasy Prezidenti Ákimshiliginiń Basshysy, Qazaqstan Respýblikasyndaǵy Adam quqyqtary jónindegi ýákil, Qazaqstan Respýblikasyndaǵy Bala quqyqtary jónindegi ýákil, Qazaqstan kásipkerleriniń quqyqtaryn qorǵaý jónindegi ýákil óz laýazymdaryna sáikes Ulttyq keńestiń quramyna kiredi.
