Syrtqy ister ministrligi ókilderi Seýlde Helloýin merekesi kezinde qaza tapqan qazaqstandyqtyń denesin elge jetkizý úshin qarajat jinaýǵa qatysty pikir bildirdi, - dep habarlaidy Massaget.kz portaly.
SIM resmi ókili Aibek Smadiiarov bul oqiǵadan keiingi kúni Koreianyń Syrtqy ister ministrligimen kelissózder júrgizilgenin jáne qaza tapqan stýdenttiń denesin Aqtóbege jetkizý boiynsha barlyq shyǵyndy korei tarapy kóteretini týraly ýaǵdalastyqqa qol jetkizilgenin aitty.
"Bul - qaiǵyly jaǵdai, máseleniń basyn ashý qiyn boldy. Seýldegi elshiligimiz qoldan kelgenniń bárin jasady. Máiit 3 qarashada Almatyǵa, 4 qarashada Aqtóbege jetkizildi. Keibir buqaralyq aqparat quraldarynda 1 qarashada máiit jetkizildi degen tekserilmegen aqparat tarady. Ókinishke qarai, osy ólimnen aqsha tabýǵa tyrysqan jáne áleýmettik jelilerde qandai da bir qarajat jinaýdy jariialaǵan adamdar bar. Biz korei tarapy deneni jetkizýdegi barlyq shyǵyndy tolyǵymen ótegenin málimdeimiz. Qaza tapqan stýdenttiń denesin Qazaqstanǵa jetkizý úshin aqsha jetkiliksiz degen aqparat shyndyqqa janaspaidy", - dep túsindirdi SIM ókili.
Eske salaiyq, 29 qazanda tústen keiin 100 myńǵa jýyq adam Helloýinniń alǵashqy demalysyn atap ótý úshin oiyn-saýyq aýdanynda bolǵan. Osylaisha, qysym saldarynan 50 adamnyń júregi toqtap qalǵan.
Keiinirek Helloýindi toilaý kezinde 155 adam qaitys bolyp, 82 adam jaralanǵany habarlanǵan bolatyn. Qaza tapqandar ishinde qazaqstandyq qyz da bar.
