Almaty turǵyny kóziniń túsin ózgertemin dep shetelde ota jasatyp, aýyr asqynýlardyń saldarynan kórý qabiletinen aiyrylyp qala jazdady. Dárigerler kúrdeli operatsiia jasap, onyń bir kóziniń kórý qyzmetin ishinara qalpyna keltirdi, dep habarlaidy ult.kz.
Densaýlyq saqtaý ministrliginiń málimetinshe, áiel shetelde kosmetikalyq maqsattaǵy kóz túsin ózgertý operatsiiasyn jasatqan. Alaida otadan keiin glaýkoma men kózdiń móldir qabyǵynyń buldyrlanýy siiaqty aýyr asqynýlar paida bolǵan.
Saldarynan naýqastyń bir kózi múldem kórmei qalǵan, al ekinshi kózi tek jaryqty ǵana ajyrata alǵan. Osyǵan bailanysty oǵan I toptaǵy múgedektik belgilengen.
Áiel Qazaqstandaǵy jáne sheteldegi birneshe meditsinalyq ortalyqqa júgingenimen, eshbir maman kórý qabiletin qalpyna keltirýge táýekel etpegen. Degenmen jaryqty sezý qabileti saqtalǵan bir kózi onyń kórýin qalpyna keltirýge jalǵyz múmkindik bolǵan.
Almaty qalalyq ortalyq klinikalyq aýrýhanasynyń oftalmologtary naýqasqa eki saǵatqa jýyq sozylǵan kúrdeli operatsiia jasady. Ota barysynda kózishilik qysymdy tómendetýge arnalǵan antiglaýkomalyq operatsiia júrgizilip, kózdiń móldir qabyǵyna transplantatsiia jasaldy.
Dárigerlerdiń aitýynsha, hirýrgiialyq emniń nátijesinde kózishilik qysym qalypqa keltirilip, operatsiiaǵa deiin tek jaryqty ǵana sezgen kózdiń kórý qyzmeti qalpyna kelgen. Qazir patsient qaitadan kóre bastady jáne dárigerlerdiń turaqty baqylaýynda ońaltý kýrsynan ótip jatyr.
