Aqtaýda Abai atyndaǵy mádeni-demalys kesheninde Ábish Kekilbaiulynyń 80 jyldyǵy aiasynda saltanatty jiyn ótti, dep habarlaidy "Ult aqparat".
Respýblikanyń túkpir-túkpirinen abyz jazýshynyń 100-ge jýyq zamandasy jinaldy.
Jiynda sóz alǵan aimaq basshysy Serikbai Trumovtyń aitýynsha, oidan, qyrdan, alystan, jaqynnan aǵylǵan aǵaiyn, san myń jyldyqtarda birtýar tulǵa óz Ábishin izdeidi. Kezdesýdi ańsaidy. Rýhymen tildesedi.
«Qazaqtyń darhan dalasyn toltyryp turar halqym bolsa deimin, tóbesi qaraiǵan árbir zatqa qýanamyn» dep armandaýmen, qýanýmen ómir súrgen Ábish aǵanyń kókirek saraiy dariia, peiili netken keń edi. Ádette, biz kózi tirisinde halqyna qalqan bola bilgen, boiyndaǵy bar kúsh-qýaty, bilim-biligi, qabilet-qarymyn eliniń bolashaǵy úshin arnaǵan, atam qazaq rýhyn jalpy álemge pash etken kesekti er ekenin bilemiz. Siz ben bizdiń osynaý mereili kezeńde bas qosýdaǵy uly missiiamyz da sol ǵibratty ǵumyr iesin ulyqtap, artyna miras etken murasyn qasterleý bolsa kerek«, - dedi Serikbai Trumov.
Óńir ákimi abyz jazýshymen birge saparlas, dámdes bolyp, júzdesken ár sát qymbat tarihqa, qundy estelikke teń ekenin aitty.
»Qazaqtyń keń dalasyn keýdesine syiǵyza bilgen aǵamyzdyń alyp tulǵasy, bolmys-bitimi, jan-dúniesi ózi týǵan topyraqqa erekshe jaqyn edi. «Endi men dúnieniń qai qyrynda júrsem de osy jerdi umytpaityn kórinem», dep ózi aitqandai, ata kúldik, altyn qazyq - Týǵan jerine degen meiirim, mahabbaty sheksiz edi. Kózi tirisinde talai eldiń igi jaqsylaryn ertip kelip, Mańǵystaýdyń ár tasyn, ár tóbesin qadirleitin edi. Erekshe maqtanyshpen, baǵzy zamanmen bailanystyra otyryp, baiandai jóneletin«, - deidi óńir basshysy.
S.Trumov atap ótkendei, Ábir Kekilbaiuly Elbasymen birge júrip, Táýelsiz Qazaqstannyń irgesin bekitip, memleketshildiktiń, saiasi qairatkerliktiń syndarly úlgisin kórsete bildi.
Ol sondai-aq Mańǵystaý óńirine sapary barysynda Memleket basshysy Qasym-Jomart Toqaev jazýshynyń mereitoiyn joǵary deńgeide ótkizýdi júktegenin eske aldy.
Eske salaiyq, 10 qazan kúni Qazaqstan Prezidenti Q.Toqaev Aqtaýda ádebiet alyby Ábish Kekilbaiulyna qoiylǵan eskertkishtiń saltanatty ashylýyna qatysty. Sondai-aq qalamgerdiń atyndaǵy tarihi-ólketaný mýzeiin aralap kórdi.
