Búgin Almaty qalasynda Qazaqstan musylmandarynyń kezekti VIII quryltaiy ótti. Quryltai jumysyna QR Din isteri jáne azamattyq qoǵam ministri Nurlan Baiuzaquly Ermekbaev, Qazaqstan musylmandary dini basqarmasy Tóralqa músheleri, Ǵulamalar keńesiniń músheleri, teolog-ǵalymdar, ziialy qaýym ókilderi, elimizdiń ár oblysynan kelgen quryltai delegattary qatysty.
Quryltai jumysynda Qazaqstan musylmandary dini basqarmasynyń 2013-2017 jyldar aralyǵynda atqarǵan is-sharalarynyń esebi tyńdaldy.
QMDB tóraǵasy Erjan qajy Malǵajyuly Bas múfti laýazymyna naib múfti Serikbai qajy Orazdyń kandidatýrasyn usyndy.
«Qurmetti quryltai delegattary, osydan 5 jyl buryn Bas múfti qyzmetine sailanǵanymda bul amanatty abyroimen atqaryp shyǵýdy Alladan surap edim. Sizdermen birge kóptegen aýqymdy is-sharalardy atqardyq. Bul amanatty orynbasarym Serikbai qajy Orazǵa tapsyrýǵa sheshim qabyldadym. Ol 20 jyldan astam dini salada qyzmet etip keledi. Dini basqarma tarihynda úsh múftidiń kezeńinde belsendiligimen kózge tústi. Onyń ideiasy men iskerliginiń arqasynda kóptegen igi jobalar júzege asty. Serikbai qajy Oraz Bas múfti qyzmetin joǵary deńgeide atqarady degen senimdemin. Sizder de bul oiymdy quptaisyzdar dep oilaimyn», – dep atap ótti.
Quryltaiǵa jinalǵan 300 delegat Serikbai qajy Orazǵa daýys berip, biraýyzdan Bas múfti laýazymyna sailady.
Serikbai Satybaldyuly quryltai delegaty aldynda dini salada aianbai qyzmet etýge senim bildirdi.
Serikbai Oraz Satybaldyuly 1975 jyly 12-sáýirde dúniege kelgen.
Bilimi:
1990-1992 jyldary Tashkent qalasynda qarilar daiyndaityn medreseni tamamdaǵan.
1992-1994 jyldary Mysyrdaǵy Al-Azhar ýniversitetinde oqyǵan.
1995-1996 jyldary Islamabadtaǵy Álemdik ýniversitetinde bilim kótergen. Almaty memlekettik Abai atyndaǵy ýniversitetinde zań fakýltetin syrttai bitirgen.
2012-2014 jyldary "Nur Múbarak" Islam mádenieti ýniversitetinde "Dintaný" mamandyǵyn támamdaǵan.
2012-2014 jyldary M.Dýlatov atyndaǵy Qostanai injenerlik-ekonomikalyq ýniversitetiniń "Menedjment" mamandyǵy boiynsha magistratýrasyn bitirip, ekonomika ǵylymdarynyń magistri akademiialyq dárejesin alǵan.
Eńbek joly:
Almaty meshitiniń naib imamy;
Islam institýtynyń ustazy;
Islam institýtynyń rektory;
Astana qalasy Aqmola oblysynyń ókil imamy;
QMDB-tóraǵasynyń orynbasary, naib múfti;
Almaty ákimshiliginiń dini bóliminiń sektor meńgerýshisi;
OQO. Saryaǵash aýdanynyń Bas imamy;
Memlekettik qyzmet agenttiginiń aǵa qyzmetkeri;
Astana qalasy Ádilet departamenti dini ister bóliminiń bas mamany;
QR Prezidenti is basqarmasynyń Ákimshilik ǵimarattar direktsiiasynyń direktory bolyp jumys istedi. Qajylyqqa barǵan.
2011-2013 jyldary Qazaqstan musylmandary dini basqarmasynyń Qostanai oblysynyń ókil imamy qyzmetin atqardy.
2013 jyly naib múfti bolyp taǵaiyndaldy.
2013 jyldyń qazan aiynda «Áziret Sultan» meshitiniń bas imamy jáne naib múfti bolyp qyzmet atqardy.
2017 jyldyń 8 jeltoqsanynda Qazaqstan musylmandarynyń kezekti VIII quryltaiynda Qazaqstan musylmandary dini basqarmasynyń tóraǵasy, Bas múfti laýazymyna sailandy:
Januialy 7 balasy bar.
