Foto: informburo.kz
Almaty oblysy Politsiia departamentiniń burynǵy bastyǵy Serik Kúdebaevqa sot úkimi shyqty, - dep habarlaidy "Ult aqparat".
Taldyqorǵan sotynyń úkimimen Serik Kúdebaev 10 jylǵa bas bostandyǵynan aiyryldy.
Búgin qashqyn general-maior Taldyqorǵan sotyna jetkizilgen bolatyn. Eks-politsei sotta sońǵy sózin sóiledi. Kúdebaev qańtar oqiǵasy kezinde óz halqyna oq atpaǵanyn málimdep, kinásin moiyndamady. Alaida sot Kúdebaevty aiypty dep tapty.
Sýdia málim etkendei, Serik Kúdebaev Qylmystyq kodekstiń 146-baby 2-tarmaǵy 1-tarmaqshasy "Azaptaý" jáne 362-baby 4-tarmaǵy – "Bilikti nemese laýazymdyq ókilettigin asyra paidalaný" baptary boiynsha kináli dep tanylyp, 10 jylǵa sottaldy. Ol jazasyn qylmystyq atqarý júiesiniń ortasha qaýipsiz mekemesinde óteitin bolady.
Aita keteiik, Serik Kúdebaevqa sot úkimi 10 naýryzda shyǵýǵa tiis edi. Alaida onyń aýrýhanaǵa túskeni habarlandy. Sodan keiin sot protsesi birneshe ret keiinge qaldy.
Kúdebaev 23 naýryzda qazaq-qyrǵyz shekarasyn zańsyz kesip ótip, Bishkekten Stambýlǵa ushyp ketken.
Al 3 sáýirde Taldyqorǵanda ótken sot otyrysynda prokýror eks-politseidiń qylmystyq isin toqtatyp, oǵan halyqaralyq izdeý jariialaýdy surady.
UQK shetelge qashqan Kúdebaevtyń shekaradan resmi jumys istep turǵan ótkizý beketteri arqyly ótpegenin málimdedi.
27 sáýirde Almaty oblysy politsiia departamentiniń eks-basshysy ustalǵany habarlandy. Bas prokýror Berik Asylovtyń aitýynsha, ol Túrkiiada ustalyp, keiin elge jetkizilgen.
