Foto ashyq derekkózden alyndy
Almaty oblystyq politsiia departamentiniń burynǵy basshysy Serik Kúdebaevqa halyqaralyq izdeý jariialandy, dep habarlaidy QazAqparat agenttigi.
«Prokýratýra Qyrǵyz Respýblikasynyń shekara qyzmetinen alǵan aqparatqa sáikes, Kúdebaev 23 naýryz kúni Bishkek qalasyndaǵy Manas halyqaralyq áýejaiynan Túrkiianyń Ystambul qalasyna ushyp ketken. Bul shekara qyzmetiniń derekter bazasymen dáleldengen. Sottalýshynyń munan ary ózge elderge júrip-turýynyń aldyn alý jáne turǵylyqty jerin anyqtaý úshin, Kúdebaevqa shuǵyl túrde halyqaralyq izdeý jariialap, oǵan bultartpaý sharasyn tutqynǵa alýǵa ózgertý qajet», - deidi sýdia áleýmettik jelide taraǵan videoda.
Taldyqorǵan qalalyq sotynyń Facebook paraqshasynda jariialanǵan aqparatqa qaraǵanda, úkimdi jariialaý aldyndaǵy sońǵy sózin sóileýi tiis bolǵan S.Kúdebaev aýyryp qalýyna bailanysty sot otyrysyna kelmegen.
Onyń aýrýhanaǵa túskenin dáledeitin anyqtamany sotqa advokaty usynǵan. Osyǵan bailanysty sot otyrystary keiingi shegerilip keldi. Osy kezeńde S.Kúdebaevqa qatysty eshqaida ketpeý jáne tiisti minez-qulyq týraly qolhat túrindegi bultartpaý sharasy qoldanylǵan.
2023 jyldyń 30 tamyzynda sot Qylmystyq-protsestik kodekstiń 157 jáne 355-baptaryna sáikes, S.Kúdebaevty 3 sáýir saǵat 10:00-de sotqa jetkizý týraly qaýly shyǵardy.
Qaýlyny oryndaý kezinde prokýror S.Kúdebaevtiń elden ketkeni týraly málimet usynǵan.
«Búgingi tańda Qylmystyq-protsestik kodekstiń 324-babyna sáikes, is izdeý jariialanýyna bailanysty toqtatyldy. Is izdeýdi qadaǵalaý úshin Jetisý oblystyq prokýratýrasyna jiberildi», - delingen sot habarlamasynda.
Eske salsaq, Almaty oblystyq politsiia departamentiniń burynǵy basshysy Serik Kúdebaev qańtar oqiǵasy boiynsha kúdikti dep tanylǵan edi. Sot talqylaýy barysynda prokýror sýdiadan Kúdebaevqa 9 jylǵa bas bostandyǵynan aiyrý jazasyn taǵaiyndaýdy suraǵan bolatyn.
