QR Ekologiia, geologiia jáne tabiǵi resýrstar vtsie-ministri Serik Qojaniiazov Syrdariianyń boiyndaǵy eldi mekender úshin biylǵy jaz da aýyr bolýy múmkin ekenin eskertti, habarlaidy QazAqparat.
«Syrdariia ózeniniń sýy mol jyldarda Toqtaǵul sý qoimasy tolyp ketetin. Bul – ózenniń eń joǵarǵy bóliginde ornalasqan sý qoimasy. Onyń syiymdylyǵy – 19,5 mlrd tekshe metr. Jazda ekologiialyq jaǵdai qalypty bolýy úshin sáýir aiyna qarai osy qoimaǵa 15 mlrd tekshe metr sý jinalýy kerek. Ókinishke qarai, keiingi 4 jyl ishinde Toqtaǵul qoimasyna munsha sý jinalmai jatyr. Ázirge kóńil kónshitindei jaǵdai joq. Aqpan aiynda qardyń qalai bolatynyn bilmeimiz», - degen ministrlik ókili Ózekbstan, Qyrǵyzstan jáne Qazaqstan arasynda keńes zamanyndaǵy kelisim qaita kúshine enip, jaǵdaidy retteýge múmkindik týǵanyn eske saldy. Biraq aimaqtaǵy qurǵaq tsikl ol kelisimniń de múmkindigin shektep otyr.
«Byltyr Toqtaǵuldyń sýyn ózara tiimdi paidalaný úshin Qazaqstan men Ózbekstan aldaǵy úsh jyldyń qysynda qyrǵyz tarapyna elektr qýatyn berip turýǵa kelisken. Aqysyna olar jazda bizge qajetti sý berýi kerek. Osyndai aiyrbas kestesi boiynsha jumys istegenbiz», - dedi ministrdiń orynbasary.
Serik Qojaniiazovtyń aitýynsha, Qazaqstan tarapy biyl da sol kelisimniń múltiksiz oryndalýyna kúsh salyp otyr.
«Biz qyrǵyz tarapymen kelistik. Jyl sońyna deiin jetkizip úlgermegen elektr qýatyn, biyl birinshi toqsannyń sońyna deiin jetkizbekpiz. Sol boiynsha jumys júrip jatyr. Syrdariianyń sýly bolýy Toqtaǵul qoimasyna bailanysty. Ókinishke qarai, etektegi, Aral mańyndaǵy jaǵdai aitarlyqtai jaqsara qoiǵan joq. Tipti Kóksarai qarymta rettegishine qajetti sýdy da jinai almaimyz ba degen qorqynysh bar. Shardarada ǵana sý bolatyn shyǵar. Biyl da jaǵdai qiyn bolady. Óitkeni jazǵy vegetatsiia kezeńin Kóksaraisyz ótkeretin siiaqtymyz», - dedi vitse-ministr.
