Álemdik jáne dástúrli dinder kóshbasshylarynyń VI sezinde sóz sóilegen Serbiia Respýblikasynyń prezidenti Aleksandr Výchich din arasyndaǵy dialogty jolǵa qoiǵan sez jumysyna joǵary baǵa berdi, dep habarlaidy QazAqparat tilshisi.
«Álemdik qaýipsizdik pen turaqtylyqty qamtamasyz etý úshin qolymyzdan kelgenniń bárin de jasaimyz. 2003 jyldan bergi Qazaqstan Prezdentiniń álemdik din basshylarynyń basyn qosý týraly bastamasynyń arqasynda barlyq din basshylary ózderiniń qundy ideialaryn aityp keledi. Islam dini, Pravoslav dini, ózge de dinderdiń ókilderi bas qosqan osy jerde meniń de qandai múddem bar ekenin de aitqym keledi. Naqtyraq aitqanda, bárimizdiń múddemiz, mindetimiz - órkenietti qorǵaý. Osy forýmǵa qyzyǵýshylyq tanytýymyzdyń sebebi - bul jerde turaqty dialogtyń bolýy», - dedi Aleksandr Výchich.
Serbiia Respýblikasynyń prezidenti álemdik jáne dástúrli dinder kóshbasshylary árbir adamdy jamandyqtan qutqaryp, jaqsylyqqa bastaitynyn, rýhani qundylyqtardy qorǵap kele jatqanyn tilge tiek etti.
«Din liderleri qazirgi tańda álemdik deńgeidegi bedeldi tulǵalar bolyp tabylady. Sondyqtan, olardyń aitqan ideialary, negizgi ilimderi qundylyqtarǵa negizdeledi. Geosaiasat ókilderiniń din basshylarynyń sózderine qulaq aspaityn kezderi bar. Al túptep kelgende álemdik din basshylarynyń ideiasy - halyqaralyq quqyqqa negiz bolyp otyrǵanyn aita ketý kerek. Árbir adamnyń jeke basyn syilamaiynsha biz turaqtylyqqa qol jetkize almaimyz», - dedi ol.
Eske sala ketsek, elordada QR Prezidenti Nursultan Nazarbaevtyń tóraǵalyǵymen Álemdik jáne dástúrli dinder kóshbasshylarynyń VI sezi ótip jatyr.
Sez barysynda Qazaqstan Prezidenti Nursultan Nazarbaev memleketter arasyndaǵy senimdi nyǵaityp, qaýipsiz álemdi qalyptastyrý jolynda konfessiiaaralyq, órkenietaralyq dialog ortalyǵyn bekitýge daiyn ekenin málimdegen bolatyn.
Sondai-aq Qazaqstan Prezidenti Vatikannyń papalyq keńesine «Dinaralyq dialogqa úles qosqany» úshin syilyǵyn tabys etti.
