Foto: ashyq derekkóz
Jambyl oblysynda sabaq kezinde besinshi synyp oqýshylary ishi aýyryp, júregi ainityny aityp shaǵymdandy. Sanitarlyq dárigerler olardyń satyp alyp jegen fastfýdyn tekserip jatyr, dep habarlaidy Ult.kz KTK arnasyna silteme jasap.
Myrzatai aýylynda 12 oqýshy ýlanyp qalǵan. Oqýshylardyń úlken úzilis kezinde mektepke jaqyn dúkenge baryp, sendvich pen býrger satyp alǵany belgili boldy. Osydan keiin balalar ózderin jaisyz sezinip, ýlaný belgilerimen aýrýhanaǵa jetkizilgen.
Qazir mamandar fastfýdtyń qai quramdas bóligi sapasyz bolǵanyn anyqtap jatyr.
"Táýlik boiy aýrýhanada jatqyzý týraly kórsetkish bolmaǵandyqtan, balalar meditsinalyq baqylaýmen úilerine jiberildi. Qazir olardyń jaǵdaiy turaqty. Basqa naýqastar tirkelgen joq. Barlyq zerthanalyq synamalar alyndy, nátijeler ázirge daiyn emes", — dedi Jambyl oblysy boiynsha Sanitariialyq-epidemiologiialyq baqylaý komiteti basshysynyń orynbasary Saltanat Álibaeva.
Balalar ýlanǵannan keiin saýda núktesi birden jabylyp, bir táýlikten soń qaita ashylǵan. Al mektep ákimshiligi endi balalardyń qaida baryp, ne jep júrgenin muqiiat baqylap otyratynyn málimdedi.
