Almatynyń Medeý aýdanyndaǵy úsh qabatty taýnhaýsta gaz-aýa qospasy jarylyp, eki páter men avtokólik zaqymdandy. Oqiǵa saldarynan eki bala jeńil jaraqat aldy, dep habarlaidy ult.kz.
Oqiǵa 22 qazanda Qapparov kóshesinde bolǵan. Qalalyq ákimdiktiń málimetinshe, jarylysqa tabiǵi gazdyń shyǵýy sebep bolýy múmkin.
Aldyn ala málimet boiynsha, 11 jáne 9 jastaǵy eki bala jeńil jaraqat alǵan. Olarǵa meditsinalyq kómek kórsetilip, tekserýden keiin úilerine jiberilgen.
Jarylys saldarynan eki páter búlinip, taǵy bir avtokólikke zaqym kelgen. Oqiǵa bolǵan aýmaqtyń kólemi 75 sharshy metrdi qurady.
Qazirgi ýaqytta jaýapty qyzmetter jarylystyń naqty sebebi men ózge de mán-jailaryn anyqtap jatyr.
