Senator Aigúl Qapbarova kóshi-qon protsesterin iske asyrýdaǵy memlekettik sharalar men tetikterge qaramastan, óńirlerdegi kóshi-qon problemalary tolyq sheshilmei otyrǵanyna alańdaýshylyq bildirdi. Bul týraly senator depýtattyq saýalynda jazdy, dep habarlaidy "Ult aqparat".
«2018-2019 jyly jáne osy jyldyń 9 aiynda Soltústik Qazaqstan oblysyna ońtústik óńirden 5123 adam qonys aýdarǵan bolsa, óńirden 10 myńga jýyk adam kóship ketken. Osy oblysta sońǵy jyldary mektepter jabylyp, ǵimarattary aýktsionǵa qoiylyp satylýda», - dedi Aigúl Qapbarova Senattyń jalpy otyrysynda.
Sońǵy 5 jylda elden 189 765 adam qonys aýdarsa, 70 933 etnikalyq qazaq kóship keldi. Aiyrmashylyq 118 832 adamdy quraidy. Qazaqstannan shetelge turaqty turýǵa ketetinderdiń 43,8%-yn 15 pen 34 jasqa deiingi jastar quraityndyǵy alańdatady.
Senator syrtqy kóshi qonnyń sanyn azaitý úshin ishki kóshi qon úderisindegi eńbek teńgerimin turaqty jáne tiimdi qalpyn saqtaý mańyzdy ekenin aita kelip, el aýmaǵynyń birtutastyǵy úshin ońtústikten soltústik aimaqtarǵa baǵyttalǵan kóshi-qon úrdisin jalǵastyrý kerek dep sanaidy.
«Qonys aýdarýshylar úshin memleket beretin turǵyn úilerdiń kópshiligi qazirgi zamanǵy ómir súrý standarttaryna, normalarǵa sáikes kelmeidi. Keibir úiler qonys aýdarýshylardyń aitýynsha, apatty jaǵdaida tur. Qonys aýdarýshylardyń kásipkerlik qyzmetpen ainalysýǵa qoldaý kórsetýdiń keibir tetikteri jetkiliksiz», - dedi senator A. Qapbarova.
Senator depýtattyq saýalda halyqty kóshirýdiń arnaiy memlekettik nemese óńirlik baǵdarlamasyn ázirleýdi usynyp otyr. Sebebi qazirgi tańda halyqty kóshirý protsesi «Eńbek» nátijeli jumyspen qamtý baǵdarlamasynyń bir bóligi ǵana. Bul baǵdarlama qonystandyrý barysynda týyndaityn mindetter men máselelerdiń barlyq spektrin sheshpeidi jáne qamtymaidy.
«Óńiraralyq kóshi-qon protsesinde jas otbasylarǵa eleýli kóńil bólinip, memlekettik qoldaýdyń naqty tetikteri júzege asyrý kerek», - dedi depýtat.
Senator qonys aýdarýshylar úshin turǵyn úi berýdiń naqty tetigin pysyqtaýdy, biýrokratiialyq kedergisiz jer ýchaskelerin berý, qonys aýdarýshylardy jinaqy qonystandyrý úshin jeke turǵyn úi salýǵa jeńildetilgen nesie berý kerektigin atap ótti. Sondai-aq «Bir tereze» qaǵidaty boiynsha qonys aýdarýshylar týraly derekterdiń biryńǵai avtomattandyrylǵan aqparat júiesin engizý qajettigi aityldy.
