Senattyń jalpy otyrysynda depýtat Ábdáli Nuraliev elimizdiń Premer-Ministri Álihan Smaiylovtyń atyna joldaǵan depýtattyq saýalynda sharýalardyń naqty máselelerin sheshýge baǵyttalǵan usynystaryn aitty, dep habarlaidy QazAqparat.
Depýtattyń aitýynsha, ótken jyly qalyptasqan jaǵdai aýyl sharýashylyǵy salasynyń tehnologiialyq turǵydan artta qalýyn, tehnikalyq jaraqtandyrýdyń tómen deńgeiin, sharýashylyq júrgizýdiń ekstensivti ádisteriniń basymdylyǵyn kórsetti, sonyń nátijesinde sala qazirgi zamanǵy syn-tegeýrinderge tótep bere almaityndyǵyn baiqatty.
Senator elimizde mal azyǵy zootehnikalyq normalardan 2 ese az óndiriletinin, al qosalqy jáne usaq sharýa qojalyqtary memlekettik qoldaýdan aiyrylǵanyn atap ótti.
«Qazirgi tańda elimizdegi 1,6 myńnan astam qosalqy sharýashylyqtarda 3,5 millionnan astam tabys deńgeii tómen azamattar jumys isteidi. Olar jylyna orta eseppen 2,5 trln teńgeniń aýyl sharýashylyǵy ónimderin óndirip, elimizdiń azyq-túlik qoryn tolyqtyrýda eleýli úlesterin qosyp keledi. Ókinishke qarai, qosalqy sharýashylyqtar óndirgen ónimderdiń paidasyn ortada júrgen deldaldar kórip keledi. Al usaq qojalyqtardy memlekettik qoldaý múldem joq dep aitýǵa bolady», - dedi senator.
Osy máselelerdi sheshý úshin senator egis alqaptarynyń qurylymyn ártaraptandyrýmen jáne jemshóp, jarma, burshaq jáne maily daqyldar alqaptaryn keńeitýmen ainalysatyn sharýashylyqtardy belsendi qoldaýdy usyndy. Kooperatsiiany, onyń ishinde qosalqy jáne usaq sharýashylyqtardy yntalandyrý da mańyzdy.
«Agrosektor sýbektilerine bólinetin nesieler boiynsha paiyzdyq mólsherlemelerdi 2-3% - ǵa deiin tómendetý, qosalqy sharýashylyqtar úshin shaǵyn nesie aýqymyn keńeitý, sharýashylyq naýqany kezinde memlekettik qarajatty jyldam alý múmkindigin qarastyrý, naqty alynǵan ónimge nemese qaita óńdeýge ótkizilgen kólemge bailanysty sýbsidiialardy bólý boiynsha naqty sharalar kózdelýi tiis», - dep atap ótti senator Ábdáli Nuraliev.
