Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda «Dúniejúzilik poshta odaǵynyń Jarǵysyna toǵyzynshy qosymsha hattamany ratifikatsiialaý týraly» zań jobasy qaraldy, dep habarlaidy QazAqparat.
Qazaqstan Respýblikasy 1992 jyldan beri Dúniejúzilik poshta odaǵynyń tolyq quqyqty múshesi bolyp sanalady. QR Úkimetiniń ótinishi negizinde Dúniejúzilik poshta odaǵynyń Jarǵysyna qosyldy. Dúniejúzilik poshta odaǵy álemniń 192 elin biriktiredi, 1874 jyly qurylǵan halyqaralyq úkimetaralyq uiym bolyp otyr, sondai-aq Birikken Ulttar Uiymy mamandandyrylǵan mekemesi mártebesine ie.
«Dúniejúzilik poshta odaǵynyń basty maqsaty - ol búkil álemdegi adamdardyń qarym-qatynasyn jeńildetý úshin ámbebap, tiimdi, qoljetimdi poshta qyzmetteriniń sapasyn turaqty damytýǵa yqpal etý. Osy oraida biryńǵai poshta keńistigin qalyptastyrdy jáne jer sharynyń barlyq buryshtaryna poshta jóneltimderin óńdeý men jetkizý jónindegi jelini quraidy. Dúniejúzilik poshta odaǵy konsýltatsiialyq qyzmetterdi atqarady, tehnikalyq kómek kórsetedi, halyqaralyq poshta almasýlaryna arnalǵan erejelerdi belgileidi, poshta qyzmetteri kóleminiń ósýin yntalandyrý boiynsha usynystar beredi», - dedi QR Tsifrlyq damý, innovatsiialar jáne aeroǵarysh ónerkásibi vitse-ministri Daryn Tuiaqov.
Dúniejúzilik poshta odaǵynyń Jarǵysyna toǵyzynshy qosymsha hattama 2016 jylǵy 6 qazanda Ystanbul Dúniejúzilik poshta odaǵynyń 26 Kongresinde jasaldy, sondai-aq QR Úkimetiniń ýákiletti ókilderi qol qoidy. Jarǵyǵa poshta qyzmetin usyný protsesine jáne poshta jóneltimin jetkizý merzimine áser etpeitin redaktsiialyq sipattaǵy ózgerister engiziledi.
Atalǵan komitet músheleri zań jobasyna qoldaý bildirdi. Endi bul qujat Senattyń jalpy otyrysynda talqyǵa túsetin bolady.
