Senatorlar investorlarǵa arnalǵan salyqtyq jeńildikter týraly túzetýlerdi qabyldady. Depýtattar ekonomikanyń basym salalaryna investitsiia salýǵa ári damytýǵa daiyn investorlarǵa arnalǵan «nóldik mólsherlemeni» engizýdi usyndy, dep habarlaidy "Ult aqparat".
«Investitsiialardyń kólemine, merzimine jáne jumys ornyna bailanysty investorlar korporativtik tabys salyǵynan, jer salyǵynan, qosymsha qun salyǵynan jáne múlik salyǵynan 10 jylǵa deiingi merzimge bosatylady. Bul qadam el ekonomikasyna investorlar tartý jáne osyndai kúrdeli kezeńde jańa jobalardy iske asyrý úshin qajet. Senatorlar bul ózgeristerdi el Prezidentiniń tapsyrmasy aiasynda usynyp otyr», - dedi Máýlen Áshimbaev.
Senat depýtattarynyń pikirinshe, mundai erekshe jaǵdai otandyq ekonomika úshin kúrdeli kezeńde naryqta suranysqa ie taýar túrlerin, sonyń ishinde eksportqa shyǵarýǵa qabiletti jańa óndiristerdi bastaýǵa múmkindik beredi. Salyq boiynsha «nóldik mólsherleme» Úkimet pen investorlar arasynda jasalatyn barlyq ýaǵdalastyqtardy bekitý úshin strategiialyq investitsiialyq kelisim sheńberinde jańa qural retinde áreket ete bastaidy.
«Qazirgi jaǵdaida álemde investitsiialar úshin básekelestik baiqalyp otyr. Ol ekonomikanyń barlyq salalarynda jańa investitsiialyq jobalardy iske asyrý, sondai-aq investitsiialyq ahýaldy odan ári jaqsartý boiynsha belsendi sharalar qabyldaýdy talap etedi. Sheteldik kapitaldy tartýdyń jańa quraldaryn engizý qajet», - dedi senator Saǵyndyq Luqpanov.
Kelisimniń qoldanylýy merziminen buryn toqtatylǵan jaǵdaida salyqtar boiynsha preferentsiialar jáne Qazaqstan Respýblikasy salyq zańnamasynyń turaqtylyǵyna kepildik ol jasalǵan kúnnen bastap kúshin joiady. Sondai-aq, investitsiialyq kelisim jer qoinaýyn paidalanýshylar men aktsizdeletin taýarlardy óndirýshilerge qoldanylmaidy.
