Parlament Senaty Halyqaralyq qatynastar, qorǵanys jáne qaýipsizdik komitetiniń depýtattary Qorǵanys jáne aeroǵarysh ónerkásibi ministrliginiń basshylyǵymen kezdesip, elimizdiń áskeri ónerkásip kesheni men aeroǵarysh salasyn damytý máselelerin talqylady.
Qorǵanys jáne aeroǵarysh ónerkásibi ministri Beibit Atamqulov depýtattarǵa búgingi kúnge deiin atqarylǵan jumystar týraly baiandama jasady. Ol sondai-aq senatorlarǵa «Qorǵanys ónerkásibi jáne memlekettik qorǵanys tapsyrysy týraly» zań jobasyn tanystyryp, qorǵanys jáne aeroǵarysh qyzmeti máseleleri jónindegi qoldanystaǵy zańnamaǵa usynylyp otyrǵan ózgerister men tolyqtyrýlar týraly aityp berdi.
Senatorlar jyl boiy osy salany egjei-tegjeili zerdeledi. Olar «Qazaqstan Ǵarysh sapary» ulttyq kompaniiasynyń, Aqkól qalasyndaǵy ǵarysh kemeleri men bailanys monitoringi júiesin basqarýdyń jer ústi kesheniniń qyzmetimen tanysty, «Eurocopter» tikushaq qurastyrý zaýyty men Soltústik Qazaqstan jáne Shyǵys Qazaqstan oblystaryndaǵy qorǵanys ónerkásibi keshenine qarasty birqatar kásiporyndarda boldy. Sharalar qorytyndysy boiynsha tiisti usynystar ázirlenip, úkimetke jiberildi.
Senatorlar Serik Jaqsybekov pen Talǵat Musabaev qorǵanys ónerkásibi kesheni kásiporyndarynyń óndiris qýatyna sai tolyq kólemde jumys berilmei otyrǵanyna, damýdyń strategiialyq josparynyń joqtyǵyna, bilikti mamandar saiasatyna qatysty birqatar syn eskertpelerin aitty.
Jan-jaqty pikirsaiystan keiin Senattyń Halyqaralyq qatynastar, qorǵanys jáne qaýipsizdik komitetiniń tóraǵasy Dariǵa Nazarbaeva talqylanǵan máseleler Qarýly kúshterdi qaita jabdyqtaý tujyrymdamasyn iske asyrýda mańyzdy ról atqaratynyn atap ótti.
Memleket basshysynyń tapsyrmasyna orai Qazaqstanda taiaý jyldarda qorǵanys ónerkásibiniń 9 kásipornynda tehnologiialyq jańǵyrtý júzege asady jáne keleshegi zor ónimder óndirýge baǵdarlanǵan, eksportqa shyǵarýǵa múmkindigi bar árbir kásiporyndy jańǵyrtý jónindegi jol kartasy ázirlendi.
.jpeg)