Senatta «Bilim berý, densaýlyq saqtaý, jumyspen qamtý salasyndaǵy tsifrlandyrý: jai-kúii, qoljetimdiligi jáne qaýipsizdigi» taqyrybynda Úkimet saǵaty ótti, dep habarlaidy "Ult aqparat".
Senat baspasóz qyzmetiniń málimitenshe, atalǵan sharada eldegi tsifrlandyrýdyń qazirgi jaǵdaiy, internetpen qamtamasyz etý jáne aimaqtardaǵy aqparattyq qaýipsizdik máseleleri talqylandy
«Memleket basshysy biylǵy 10 shildede ótken Úkimettiń keńeitilgen otyrysynda pandemiia tsifrlyq ekonomika salasyndaǵy eleýli kemshilikter men olqylyqtardy anyqtaǵanyn atap ótti. Osyǵan bailanysty indet jaǵdaiynda tsifrlandyrýdy damytýdaǵy kemshilikterdi eskere otyryp, memlekettik organdardyń jumysyndaǵy tásilderdi qaita qaraý qajet dep sanaimyz», – dedi Senat tóraǵasynyń orynbasary Nurlan Ábdirov.
Vitse-spiker qazirgi ýaqytta ADSL tehnologiiasy boiynsha 118 qala men 4558 aýyldyq eldi meken internetpen qamtamasyz etilgenin aitty. Ony ári qarai damytý boiynsha jumystar júrgizilýde. Qazirgi tańda Qazaqstan halqynyń shamamen 40 paiyzy aýyldyq aimaqta turady. Búginde bailanys operatorlary qala men aýyl arasyndaǵy tsifrlyq alshaqtyqty joiýǵa baǵyttalǵan jelilik qurylys jobasyn júzege asyrýda.
«Qazaqstanda derbes derekterdiń qaýipsizdigin qamtamasyz etý servisi ázirlenýde. Bul jeke derekterdiń paidalanylýyn baqylaýǵa múmkindik beredi. Elimizde sońǵy kezge deiin derbes derekterdi qorǵaý jónindegi ýákiletti organ bolmaǵanyn aitý kerek. Derbes derekterdi jinaý, óńdeý jáne qorǵaý máseleleriniń barlyǵy operatorlardyń qaraýynda boldy. Bul adam quqyqtaryn qorǵaýmen tyǵyz bailanysty óte ózekti másele. Sondyqtan ony tiisti memlekettik organdar jedel sheshýge tiis dep esepteimiz», – dedi Senat tóraǵasynyń orynbasary.
Sharany Áleýmettik-mádeni damý jáne ǵylym komitetiniń tóraǵasy Murat Baqtiiaruly júrgizip otyrdy.
Úkimet saǵatynda tsifrlyq damý, innovatsiia jáne aeroǵarysh ónerkásibi ministri Baǵdat Mýsin sóz sóiledi. Ol memlekettik organdarda taldaý men aqparattyq tehnologiialar arhitektýrasyna júieli kózqaras joq ekenin aitty.
Senat depýtaty Altynbek Nýhuly óz baiandamasynda tsifrlandyrý salasyndaǵy birneshe ózekti máselelerdi sóz etti. Senator densaýlyq saqtaý, bilim berý jáne jumyspen qamtýdy tsifrlandyrýdyń basty maqsaty ákimshilik qujat rásimdeý protsesin jeńildetý, azamattarymyzǵa kórsetiletin kómektiń ashyqtyǵy men qol jetimdiligin qamtamasyz etý qajettiligine toqtaldy.
«Áleýmettik qyzmetterdiń portaly» avtomattandyrylǵan aqparattyq júiesin engizý azamattardyń qajettilikteri úshin mańyzdy ról atqaratynyn atap ótkim keledi», – dedi Altynbek Nýhuly.
Mańyzdy taqyrypty talqylaýǵa Senattyń Jas sarapshylar klýbynyń músheleri de qatysty. Olar tsifrlandyrýdyń durys jumysyna qatysty oi qosyp, usynystarymen bólisti.
Úkimet saǵatynyń qorytyndysy boiynsha usynymdar men usynystar qabyldandy. Olar, óz kezeginde Qazaqstan Respýblikasynyń múddeli memlekettik organdaryna joldanady, sondai-aq, zań jobalaryn qaraý barysynda jáne Komitettiń jumysynda eskeriledi.
Úkimet saǵatyn Áleýmettik-mádeni damý jáne ǵylym komiteti men Ekonomikalyq saiasat, innovatsiialyq damý jáne kásipkerlik komiteti jáne Halyqaralyq qatynastar, qorǵanys jáne qaýipsizdik komiteti uiymdastyrdy.
