Máýlen Áshimbaevtyń tóraǵalyǵymen Senat biýrosy ótip, aldaǵy jalpy otyrysta qaralatyn kún tártibi talqylandy. Osy oraida Májilisten kelip túsken zań jobalary komitetter arasynda bólinip berildi, dep habarlaidy "Ult aqparat".
Senat biýrosynyń otyrysynda Máýlen Áshimbaev Parlamentke 1 qyrkúiekte kelip túsken úsh jylǵa arnalǵan respýblikalyq biýdjet jobasyna depýtattardyń nazaryn aýdardy. Senat tóraǵasy eldiń basty qarjy qujatymen jumystyń naqty merzimin belgiledi.
«Biz osy zańdy 1 jeltoqsanǵa deiin qabyldaýymyz kerek. Ony ózderińiz jaqsy bilesizder. Sondyqtan Senat depýtattary Májilistegi áriptesterimen birge atalǵan zań jobasy boiynsha jumysty bastady. Respýblikalyq biýdjet jónindegi zań jobasyn ýaqytyly ári sapaly qabyldaý Parlament pen Úkimettiń tiimdi ózara is-qimylyna bailanysty», - dedi Máýlen Áshimbaev.
Senat tóraǵasy jurtshylyq memlekettik qarjyny bólý máselelerine erekshe nazar aýdaratynyn, qoǵamda respýblikalyq biýdjetti josparlaýǵa qoiylatyn talaptar arta túskenin eske saldy. M. Áshimbaev ony oń úrdis retinde sanaidy. Sondyqtan parlamentshiler zań jobasyn muqiiat zerdelep, qoǵam tarapynan bar suranystardy eskere otyryp pysyqtaýy qajet.
Senat biýrosynyń otyrysynda 24 qyrkúiekte ótetin aldaǵy jalpy otyrystyń kún tártibi de belgilendi. Depýtattar «2014 jylǵy 29 mamyrdaǵy Eýraziialyq ekonomikalyq odaq týraly shartqa Qyrǵyz Respýblikasynyń qosylýyna bailanysty Qyrǵyz Respýblikasynyń 2014 jylǵy 29 mamyrdaǵy Eýraziialyq ekonomikalyq odaq týraly shartty, Eýraziialyq ekonomikalyq odaqtyń quqyǵyna kiretin jekelegen halyqaralyq sharttardy jáne Eýraziialyq ekonomikalyq odaq organdarynyń aktilerin qoldanýy jónindegi jaǵdailar men ótpeli erejeler týraly 2015 jylǵy 8 mamyrda qol qoiylǵan hattamaǵa ózgeris engizý týraly hattamany ratifikatsiialaý týraly» zań jobasyn qaraidy. Senatorlar Palatanyń qaraýyna «Qazaqstan Respýblikasy men Birikken Arab Ámirlikteri arasyndaǵy sottalǵan adamdardy berý týraly shartty ratifikatsiialaý týraly» zań jobasyn da shyǵardy.
Sonymen qatar, biýroda Májilisten kelip túsken zań jobalary komitetterge bólinip berildi. «Qazaqstan Respýblikasynyń keibir zańnamalyq aktilerine mádeniet máseleleri boiynsha ózgerister men tolyqtyrýlar engizý týraly» zań jobasy boiynsha Áleýmettik-mádeni damý jáne ǵylym komiteti bas komitet bolyp belgilendi. «Qazaqstan Respýblikasy men Ýkraina arasyndaǵy qylmystyq ister boiynsha quqyqtyq kómek týraly shartty ratifikatsiialaý týraly» zań jobasy boiynsha Konstitýtsiialyq zańnama, sot júiesi jáne quqyq qorǵaý organdary komitetine qorytyndy daiyndaý tapsyryldy.
