Túrkistan oblysyna QR Parlamenti Senaty janyndaǵy Senatorlar keńesiniń músheleri keldi. Senatorlar Túrkistan oblysy ákimdiginiń májilis zalynda oblystyq, aýdandyq jáne qalalyq máslihat depýtattarymen kezdesti. Jiyndy oblystyq máslihat hatshysy Qairat Balabiev júrgizip otyrdy. Ol mártebeli meimandarǵa óńirde atqarylyp jatqan jumystar, máslihattyń bastamalary týraly baiandap berdi.
Qazaqstan Respýblikasy Parlamenti Senatynyń janyndaǵy Senatorlar keńesi Tóraǵasynyń orynbasary Birǵanym Áitimova atalǵan keńestiń quramymen, josparymen tanystyrdy. Túrkistandaǵy qurylys qarqynyn, qalanyń sáýletin joǵary baǵalady.
«Búgin aldaryńyzǵa Senatorlar keńesiniń bir top ókili kelip otyr. Ózderińizben júzdesýdegi maqsat – zań shyǵarý salasyndaǵy jańalyqtardy, Prezidenttiń bastamasymen júzege asyrylyp jatqan reformalar týraly baiandaý. Erkin pikir almasý. Senatorlar keńesi – beiresmi uiym. Memlekettik saiasatty júrgizýge járdemshi bolýdy maqsat tutady. Óńirdi aralap kórdik. Túrkistan – Astanadan keiingi memlekettik deńgeide qurylysy jyldam júrgizilgen shahar. Damyǵan, sáýletti qalaǵa ainalypty. Túrki áleminiń rýhani otalyǵyndaǵy ózgerister kózge kórinip tur. Túrkiler tórinde erkin pikir almasyp, tájiribeli senatorlarǵa suraq qoiyp, usynys berýge múmkindikterińiz bar», – dedi. B.Áitimova.
Qoǵam qairatkeri Qýanysh Sultanov memleketti damytý, azamattyq qoǵamdy damytý, máslihattardyń rólin arttyrý jáne ózge de máseleler týraly oi qozǵady. Túlegen Túrkistan tórinde el azamattarymen júzdeskenine qýanyshty ekenin jetkizdi. Respýblika kúniniń mán-mazmuny, ideologiialyq máseleler týraly da pikirin bildirdi.
Jalpy jiynǵa Qýanysh Aitahanov, Svetlana Jalmaǵambetova, Orynbai Rahmanberdiev, Álimjan Qurtaev jáne ózge de azamattar arnaiy qatysyp, jergilikti máslihattardaǵy depýtattarmen júzdesti.
