Parlament Senaty Ekonomikalyq saiasat, innovatsiialyq damý jáne kásipkerlik komitetiniń keńeitilgen otyrysynda «QR Úkimeti men RF Úkimeti arasyndaǵy «Baiqońyr» keshenin gazben jabdyqtaý týraly kelisimdi ratifikatsiialaý týraly» zań jobasy talqylandy, dep habarlaidy QazAqparat.
«Baiqońyr» keshenin gazben jabdyqtaý týraly kelisim 2019 jylǵy sáýirde jasaldy.
«Kelisim tutynýshylardy suiytylǵan munai gazynan tabiǵi gazǵa kóshirýdi kózdeidi. Kelisimge sáikes, tabiǵi gazǵa qala aýmaǵynda jáne «Baiqońyr» ǵarysh ailaǵynda reseilik salyq organdaryna tirkelmesten ótkizý quqyǵy «QazTransGaz Aimaq» AQ-ǵa beriledi. Bul qosarly salyq salýǵa jol bermeidi. «QazTransGaz Aimaq» pen «Baiqońyr» qalasy tutynýshylary arasyndaǵy gazdy bólshek saýdada satý sharttary Qazaqstan zańnamasyna sáikes jasalatyn bolady. Bul atalǵan sharttardy jasasý kezinde zańnamany qazaqstandyq nemese reseilik qoldanýǵa qatysty daýly máselelerdi boldyrmaýǵa múmkindik beredi», - dedi Energetika vitse-ministri Áset Maǵaýov.
Onyń sózine qaraǵanda, kelisimde Baiqońyr qalasynyń aýmaǵynda tabiǵi gazdy bólshek saýdada ótkizý baǵasy Qyzylorda oblysynyń gaz tutynýshylary úshin Qazaqstannyń monopoliiaǵa qarsy organy belgileitin baǵaǵa sáikes kelýi tiis dep bekitilgen.
«Búginde Baiqońyr qalasynda 328 kóppáterli turǵyn úi, 45 jeke turǵyn úi gazǵa qosyldy, sondai-aq úsh balabaqsha, bes jalpy bilim beretin mektep jáne kóp salaly aýrýhana tabiǵi gaz júiesimen qamtylǵan», - dedi vitse-ministr.
Aita keteiik, Baiqońyr qalasynda bir aida as ázirleý úshin bir páter ortasha eseppen suiytylǵan gaz úshin 2856 teńge somasynda tólegen. Búginde tabiǵi gazdy paidalaný kezinde osyndai mólsherdegi gaz úshin turǵyndar 186 teńge tóleýde. Bul suiytylǵan munai gazynan 15 ese tómen.
Osy kelisim turǵyndar úshin kommýnaldyq qyzmet shyǵyndaryn azaitýǵa múmkindik beredi. Sebebi suiytylǵan gazǵa qaraǵanda, tabiǵi gazdyń quny aitarlyqtai arzan.
