Palata Tóraǵasy Máýlen Áshimbaevtyń tóraǵalyq etýimen Biýro otyrysy boldy. Onda depýtattar 2021 jylǵy 18 aqpanda ótetin Senattyń aldaǵy otyrysynyń kún tártibin talqylady. Bul týraly QazAqparat Senattyń baspasóz qyzmetine silteme jasap habarlaidy.
Senatorlar «Qazaqstan Respýblikasynyń keibir zańnamalyq aktilerine normashyǵarmashylyqty jetildirý máseleleri boiynsha ózgerister men tolyqtyrýlar engizý týraly» zań jobasyn qaraidy. Zań jobasy zańdardyń sapasyn arttyrýǵa, norma shyǵarý protsesin tsifrlandyrýǵa jáne oǵan jurtshylyqty keńinen tartýǵa baǵyttalǵan. Máselen, zań jobalaryn ázirleýdiń barlyq satylarynda súiemeldep otyratyn «E-zańnama» elektrondyq júiesin engizý josparlanyp otyr.
Senatorlar otyrysta sonymen qatar «Jer qoinaýy jáne jer qoinaýyn paidalaný týraly» Qazaqstan Respýblikasynyń Kodeksine ýran óndirý máseleleri boiynsha ózgerister men tolyqtyrýlar engizý týraly» zań jobasyn da talqyǵa salatyn boldy. Osy qujatqa sáikes jer qoinaýyn paidalanýshylar jobalaý qujattaryn daiyndaý kezinde ýran óndirýdiń zardaptaryn joiý jobasyn da ázirleýi tiis. Odan basqa, ýran ken orny qorlary kóleminiń ósýi artqan jaǵdaida óńirdiń áleýmettik-ekonomikalyq damýyna qarjy bólýge de mindetti bolady.
Senatorlar osy sessiiada ózderiniń bastamasy boiynsha ázirleýdi josparlaǵan 8 zań jobasyn da talqylady.
Atap aitqanda, depýtattar »Qazaqstan Respýblikasynyń sot júiesi men sýdialarynyń mártebesi týraly» Konstitýtsiialyq zańǵa, Ákimshilik quqyq buzýshylyq týraly kodekske ózgerister men tolyqtyrýlardy jáne sot júiesin jańǵyrtý máseleleri jónindegi basqa da zańnamalyq aktilerdi daiyndaýǵa niettenip otyr. 1 shildeden bastap Ákimshilik rásimdik-protsestik kodekstiń engizilýine bailanysty ákimshilik ádilet júiesiniń tolyqqandy jumys isteýin qamtamasyz etý jáne memlekettik organdar qatysatyn sot protsesterinde azamattardyń kepildikteri men quqyqtaryn arttyrý osy jumystyń nátijesi bolýǵa tiis.
Depýtattardyń bastamasy boiynsha ázirlenetin Salyq kodeksine túzetýler biznestiń jańa sýbektilerine neǵurlym qolaily biznes orta men investitsiialyq ahýaldy qalyptastyrýǵa kómektesetin bolady. Ázirlenetin «Qazaqstan Respýblikasyndaǵy Adam quqyqtary jónindegi ýákil týraly» zań ombýdsmen mártebesin zańnamalyq retteýdi maqsat etedi.
Senatorlar «Qazaqstan Respýblikasynyń keibir zańnamalyq aktilerine qurylys jáne turǵyn úi-kommýnaldyq sharýashylyq máseleleri boiynsha ózgerister men tolyqtyrýlar engizý týraly» zań jobasynda sáýlet jáne qala qurylysy salasyndaǵy memlekettik baqylaýdyń tiimdiligin arttyrý, eldi mekenderdi salýdy josparlaý jáne qurylys jobalaryn ázirleý sapasyn arttyrý jónindegi jańa erejelerdi bekitýdi josparlap otyr. Senatorlar ázirlep jatqan «Qazaqstan Respýblikasynyń keibir zańnamalyq aktilerine ǵylym máseleleri boiynsha ózgerister men tolyqtyrýlar engizý týraly» zań jobasyndaǵy ózgerister áleýmettik qaýipsizdikti arttyryp, ǵalymdarǵa laiyqty jaǵdai jasaityn bolady. Odan basqa senatorlar Qazaqstan Respýblikasynyń keibir zańnamalyq aktilerine organikalyq ónim óndirý máseleleri boiynsha ózgerister men tolyqtyrýlar engizý týraly« zań jobasyn ázirleitin boldy. Ol qujat organikalyq ónim óndirisiniń ulǵaia túsýin jáne ekologiialyq taza ónim eksportyn qamtamasyz etý úshin ony óndirýshilerdi ekonomikalyq yntalandyrýǵa baǵyttalǵan.
Senatorlar otyrys barysynda arasynda Májilisten kelip túsken birqatar zań jobalaryn turaqty komitetterge bólip berdi.
