Respýblikalyq biýdjettiń jartysynan astamy áleýmettik salaǵa jáne halyqtyń ómirin jaqsartýǵa baǵyttalady. Degenmen, ony tiimdi paidalanýda aiqyn kemshilikter bar. Bul týraly Senattyń jalpy otyrysynda elimizdiń Premer-Ministrine saýal joldaǵan Aigúl Qapbarova aitty, dep habarlaidy QazAqparat.
Onyń atap ótýinshe, statistikalyq derekter boiynsha 2020 jyly jumyssyzdyq deńgeii 4,9 paiyzdy qurady. Resmi statistika kórsetkendei, jumyssyzdyq deńgeii búgingi kúni ózgerissiz qalady. Bul - 450 753 adam. Alaida, bul sandarǵa sený qiyn.
«Kóptegen damyǵan elderde epidemiologiialyq jaǵdaiǵa bailanysty eńbek naryǵyndaǵy jaǵdai kúrt ózgerdi, jumyssyzdyq deńgeii kem degende 10 paiyzdy qurady. Al Qazaqstandaǵy ózgerister – 0,2 paiyz. Bul sandar qoǵamǵa da, ekonomikalyq sarapshylarǵa da senim uialatpaidy. Prezident Qasym-Jomart Toqaev memlekettik organdarǵa tsifrlyq oiyndardy toqtatyp, azamattardyń naqty ómirin jaqsartýǵa naqty tapsyrma berdi. Osyǵan bailanysty, qalyptasqan jaǵdaidy eskere otyryp, Úkimet halyqty jumyspen qamtý boiynsha qandai keshendi sharalar qabyldap jatyr degen suraq týyndaidy», - dep atap ótti depýtat.
Sonymen qatar Aigúl Kapbarova nazaryn jumyssyzdyqpen kúres boiynsha qabyldanyp jatqan sharalardyń tiimdiliginiń tómendigine nazar aýdardy. Esep komitetiniń derekteri boiynsha daǵdarysqa qarsy jobalardyń bar-joǵy 14% - y uzaq merzimdi ekonomikalyq aktivter men obektilerdi qurýǵa baǵyttalǵan. Jumyssyzdyqqa qarsy kúreste jaýapty organdar qysqa merzimde áser etetin ádisterdi jii tańdaidy. Osyǵan bailanysty senator osy saladaǵy jaǵdaidy jaqsartý boiynsha birqatar sharalardy usyndy.
«Jumyspen qamtýǵa járdemdesýdiń belsendi sharalary kózdelgen qazirgi «Eńbek» jumyspen qamtý baǵdarlamasyna qosymsha, infraqurylym obektilerin salý jáne damytý esebinen jumys oryndaryn qurý jónindegi sharalardy qamtityn «Jumyspen qamtýdyń jol kartasy (JQJK)» baǵdarlamasyna bólingen 1 trln teńge qarajattyń durys jumsalýyn qatań qadaǵalaý jáne qarjynyń sapaly igerilýin zerdeleý jumystaryn júrgizý qajet. Bul eki baǵdarlama túpki maqsatynan aýytqymai, halyqty turaqty jumyspen qamtýy tiis», - dedi depýtat.
