Senator Rysqali Ábdikerov elimizdiń Premer-Ministri Álihan Smaiylovtyń atyna joldaǵan depýtattyq saýalynda Jezqazǵan jáne Sátbaev qalalarynyń turǵyndaryn taza aýyz sýmen qamtamasyz etý problemalaryn jariia etti, dep habarlaidy QazAqparat.
Senator Keńgir sý qoimasy – jezqazǵandyqtardyń aýyz sýynyń negizgi kózi ekenin aita kelip, onyń áli kúnge deiin jekemenshikte ekenin, biraq zań boiynsha ol memlekettik menshikte bolýy tiis ekenin atap ótti. Ony 1996 jyly Úkimettiń qaýlysy boiynsha memlekettik basqarýǵa qaitarý kerek bolatyn.
«Biraq bul mindet ártúrli syltaýmen oryndalmady. Osylaisha, strategiialyq mańyzy zor nysan «Sý kodeksiniń» jáne «Memlekettik múlik týraly» zań talabyna sai jeke menshik qolynan memleket ieligine qaitarylmai qaldy. Qazir Keńgir sý qoimasy gidrotehnikalyq qurylymdarymen birge «Qazaqmys Distribiýshn» JShS-niń ieliginde», - dedi senator.
Rysqali Ábdikerov sonymen qatar Jezdi sý qoimasyna qatysty máselelerdi de aitty. Ol Jezqazǵan jáne Sátbaev qalalarynyń turǵyndaryn kókónistermen jáne et-sút ónimderimen qamtamasyz etýge kómektesýi tiis edi. 2011 jyly Úkimet qaýlysynda Jezdi sý qoimasyn Talap sýarý júiesiniń magistraldyq kanalymen qaita jańartý kózdelgen bolatyn. Ókinishke qarai, senator atap ótkendei, óńirge arnalǵan ózekti joba qaǵaz júzinde ǵana qaldy.
«Osyǵan bailanysty Keńgir jáne Jezdi sý qoimalarynyń mártebesi zańdy túrde qashan retteledi degen suraqqa jaýap berýińizdi suraimyn, Jezqazǵan qalasyn jer asty sýymen tolyqtai qamtamasyz etý máselesin sheshý jospary Úkimette bar ma? Memleket basshysynyń ótken jyldyń qazan aiyndaǵy «Úkimet ákimdikpen jáne korporatsiiamen birlese otyryp, adamdardy taza aýyz sýmen qamtamasyz etýdi qysqa merzimde jáne bir jarym jyldan aspaityn merzim ishinde sheshýi tiis» degen tapsyrmasy qandai merzimde oryndalady?»,- dedi senator Ábdikerov óziniń depýtattyq saýalynda.
