QR Parlamenti Senatynyń depýtaty Rysqali Ábdikerov QR Premer-Ministri Asqar Maminge depýtattyq saýal joldady. Onda senator elimizdiń Mádeniet jáne sport ministrligi 2007 jyly memlekettik baǵdarlama aiasynda ashqan Qazaqstan ulttyq elektrondyq kitaphanasy kazneb.kz portalyndaǵy tsifrlandyrylǵan elektrondyq kitaptardyń sapasyn synǵa aldy, dep habarlaidy "Ult aqparat".
Ondaǵy elektrondyq kitaptardyń 3D nusqasyn oqý qiynǵa soǵady, mátinderi anyq emes, bulyńǵyr, keibir aýdio-kitaptar múldem ashylmaidy. Qazirgi ýaqytta portaldyń segmenti ádebiettiń 60 myńnan astam elektrondyq kóshirmesin qamtidy. Onyń ishinde balalarǵa arnalǵan elektrondyq kitaptar sany 5 551 danany qurap otyr. Degenmen, búginde Qazaqstanda shyǵatyn barlyq basylymdardyń elektrondyq nysany kazneb.kz portalynda jariialanbai otyr. Máselen, Bilim jáne ǵylym ministrligi shyǵaratyn mektep pán kitaptarynyń elektrondyq nusqalary tolyqtai qamtylmaǵan.
Búginde elimizdiń kitaphana qorynda jalpy 112 millionnan astam basylym bar, al olardyń tek 1,5 millionǵa jýyǵy ǵana elektrondyq nusqada. Bul – kitaphana qorynyń jalpy kóleminiń nebári 1,3 paiyzyn qurap otyr. Respýblika boiynsha 3 940 kitaphananyń 1 892-si, iaǵni 48 paiyzy ǵana internet jelisine qosylǵan. Bul árine jetkiliksiz, ásirese, qazirgi qashyqtan oqytý jaǵdaiynda. Sondyqtan, balalarǵa arnalǵan jeke Qazaqstan Ulttyq elektrondyq balalar kitaphanasy portaly ashylsa – nur ústine nur bolar edi.
«Osyǵan orai, «Kitaphana isi týraly» zań jobasyn ázirleýdi; Balalarǵa arnalǵan Qazaqstan Ulttyq elektrondyq balalar kitaphanasy portalyn ashýdy; Qazaqstanda basylyp shyǵarylatyn barlyq jariialanymdardyń mindetti danasynyń elektrondyq nysanyn kazneb.kz portalyna joldaý boiynsha naqty júiesin qalyptastyrýdy; Kitaphanalardy Brail qarpi, úlkeitilgen qarip, sondai-aq zamanaýi tsifrlyq jáne DEIZI (DAISY) nysanyndaǵy kitaptarmen jetkilikti túrde qamtamasyz etýdi qarastyrýyńyzdy ótinemiz», – dedi senator.
