Sheteldik kompaniialar joldardy salyp shyǵady, kúre joldarda jaryq joq, qyzmet kórsetý nashar, al shamadan tys júk tielgen aýyr kólikter asfaltta esh baqylaýsyz júredi. Olar joldyń byt-shytyn shyǵardy. Senator Talǵat Júnisov óziniń depýtattyq saýalynda elimizdegi jol salasynyń problemalary týraly jariia etti, dep habarlaidy "Ult aqparat".
Senatordyń aitýynsha, Aqmola oblysynyń turǵyndary men máslihat depýtattary joldardyń jaǵdaiyna bailanysty birneshe ret shaǵym jazǵan kórinedi. Depýtat jekelegen óńirlerde oblystyq mańyzy bar sapaly joldardyń úlesi áli de 60%-ǵa jetpeitini týraly derekter keltirdi. Taǵy bir másele – jol qurylysynyń baǵasyn anyqtaý. Sheteldik merdigerler materialdardy tómen baǵada usynyp, konkýrstarǵa jii qatysady. Osyǵan bailanysty otandyq kompaniialar kelisimsharttan bas tartady nemese baǵa dempingine beiimdelýge májbúr bolady. Bul joldyń sapasy men jumys merzimine teris áser etedi.
"Jol qozǵalysynyń qaýipsizdigi kóbinese joldyń sapasy men jabdyqtalýyna, aialdamalar men jaiaý júrginshiler ótkelderiniń bolýyna, sondai-aq olardyń jaryqtandyrylýyna bailanysty. Respýblikalyq mańyzy bar qalalar men oblys ortalyqtarynan tys jerdegi joldardyń kóptegen ýchaskesinde jaryq joq. Bul tek infraqurylymnyń artta qalǵany ǵana emes. Qarjynyń shyn mánindegi azdyǵyn, elektr energiiasy tarifiniń óte joǵary ekenin naqty aitý kerek. Bul belgili bir dárejede májbúrli únemdeý men apattarǵa jáne qaiǵyly jaǵdaiǵa ákeledi. Jol boiyndaǵy servistik qyzmetke nemese onyń bolmaýyna bailanysty azamattardan únemi shaǵym túsip turady. Osyǵan bailanysty, osy máselelerdi kezeń-kezeńimen kelise otyryp, birte-birte sheshýge kirisý qajet", - dedi Talǵat Júnisov.
Senator sonymen qatar aýyr júk kólikteriniń qozǵalysyn baqylaýdy kúsheitý qajettigin atap ótti. Óitkeni olar, ásirese ondai júk kólikterine arnalmaǵan joldardy buzyp ketedi.
"Avtojol salasyndaǵy jobalardy iske asyrýǵa otandyq kompaniialardy tartý, joldardyń sapasy men jan-jaǵyn, ásirese aýyldyq eldi mekender men qala mańyn kórkeitý, onyń ishinde olardyń jaryqtandyrylýyn kezeń-kezeńimen kóbeite berýdi, sondai-aq jol boiyndaǵy servisti jaqsartý jóninde pármendi sharalar qabyldaýdy suraimyz. Sondai-aq baqylaýdy kúsheitý nemese elimizdiń joldarynda dóńgelek biligine júkteme erejesin saqtamaityn aýyr júk mashinalarynyń júrýine shekteý qoiý mańyzdy", - dedi senator.
