Senator Nurjan Nursipatov «Máńgilik el jastary - indýstriiaǵa!» - «Serpin-2050» memlekettik baǵdarlamasynyń iske asyrylý barysyna alańdaýly, dep habarlaidy QazAqparat.
Depýtat Premer-Ministrdiń orynbasary Eraly Toǵjanovtyń atyna joldaǵan depýtattyq saýalynda atalǵan másele boiynsha jaǵdaidy jaqsartýǵa yqpal etetin birqatar qadamdardy usyndy.
Senatordyń pikirinshe, memlekettik baǵdarlamany iske asyrý aiasynda 2014-2019 jyldary elimizdiń soltústiginde ornalasqan kolledjder men joǵary oqý oryndaryna túsýge niet bildirýshilerdiń sany artqan. Alaida, ótken jyly jaǵdai túbegeili ózgergen.
«Bilim jáne ǵylym ministrligi 2014 jylǵy «Ońtústik óńirlerden kelgen jastar arasynan memlekettik tapsyrysqa sáikes tehnikalyq jáne kásiptik bilim berý boiynsha bir mamandy daiarlaýǵa arnalǵan shyǵyndardy esepteý Tártibin bekitý týraly» buiryǵynyń kúshi joiylýyna bailanysty áleýmettik sipattaǵy ótkir problema týyndap otyr. Buryn ońtústik óńirlerden kelgen stýdentter jyly kiim satyp alý úshin kóterme qarajatpen, oqý ornyna barý jáne keri qaitý jolaqysy úshin tolyq kólemde ótemaqymen, ystyq tamaqpen qamtamasyz etilse, endi atalǵan buiryqtyń kúshi joiylýyna bailanysty ońtústik óńirlerden kelgen stýdentter jalpy negizde qarjylandyrylady. Osylaisha, jeńildiktiń alynyp tastalýy ońtústik óńirden kelgen túlekterdiń soltústik óńirlerdegi kolledjder men joǵary oqý oryndarynda oqýǵa degen yntasy joǵaltý sebepteriniń biri boldy. Sondyqtan 2020-2021 jyldary jańa talapkerlerdi qabyldaý júzege asyrylmady», - dedi depýtat.
Osyǵan bailanysty senator Nurjan Nursipatov strategiialyq mańyzy bar baǵdarlamaǵa erekshe nazar aýdarýdy surady jáne jaǵdaidy jaqsartý úshin birqatar sharalardy usyndy. Olardyń ishinde, tiisti buiryqtyń normalaryn qalpyna keltirý, diplom alǵan mamandardy memlekettik turǵyn úi qory esebinen turǵyn úimen qamtamasyz etý sekildi máseleler bar.
