Parlament Senatynyń jalpy otyrysynda depýtat Erik Sultanov Soltústik Qazaqstan oblysyndaǵy aýyz sý máselesin kóterdi. Osy oraida Premer-Ministr Asqar Maminge depýtattyq saýal joldady, dep habarlaidy "Ult aqparat".
Senator keltirgen málimetterge sáikes, 2,5 myńnan astam aýyldyq jerde áli kúnge deiin sapaly aýyz sý joq. Bunyń negizgi sebebi – biýdjettik baǵdarlamanyń durys baqylanbaýy jáne 2019-2020 jyldary biýdjetten bólingen qarajattyń igerilmeýi.
«Soltústik Qazaqstan oblysynyń sý qubyrlarynyń 67 paiyzy nemese 1955 km tolyǵymen tozǵan jáne toptyq sý qubyrlary júiesiniń aqaýly tehnikalyq jaǵdaiy tótenshe jaǵdailardyń týyndaýyna alyp kelip otyr. Olar Soltústik Qazaqstan jáne Qostanai oblystarynyń 200-den astam aýyldyq eldi mekenderin sýmen qamtamasyz etýge qaýip tóndirip otyr. Magistraldyq qubyrlardyń qatty tozýyna bailanysty tasymaldaý kezinde sý shyǵynynyń jalpy kólemi 65 paiyzdy quraidy», – dedi Sultanov.
Senator óz sózinde problemalyq jobalardy da aita ketti. Presnov toptyq sý qubyryn qaita qalpyna keltirý jobasyn iske asyrý 2014 jyldan beri júrip jatyr, alaida áli aiaqtalǵan joq. 2019 jyly jumystardy oryndaý qarqynynyń tómendigine bailanysty 2,9 mlrd teńge igerilmei, biýdjetke qaitarylǵan. 2020 jyly jobany jalǵastyrýǵa 1,1 mlrd teńge bólindi, biraq bul qarajattyń da igerilmeý qaýpi bar.
«Osy máseleniń áleýmettik-ekonomikalyq mańyzdylyǵyn eskere otyryp, Sizden Soltústik Qazaqstan oblysynyń aýyl halqyn sýmen jabdyqtaý problemalaryn joiý boiynsha tiimdi sharalar qabyldaýyńyzdy jáne zańnamada belgilengen tártippen jazbasha jaýap berýińizdi suraimyz», – dedi Senat depýtaty Erik Sultanov.
