Aqmola oblysyndaǵy Krasnyi Iar aýylynda qandastar úshin salynǵan "Nurly kósh" shaǵyn aýdanynyń problemasy ulttyq komissiianyń qaraýyna shyǵarylady. Osylaisha, 11 jyldyq tarihy bar problema sheshilýi kerek. Bul týraly Otandastar qorynyń janyndaǵy qoǵamdyq komissiianyń otyrysynda senator Murat Baqtiiaruly málimdedi, dep habarlaidy Sputnik Qazaqstan.
"Byltyr bir top senator sol aýyldy baryp kórdik. Shynymen de, kóshe tartylǵan, elektr qýaty berilgen. Ol jaǵynan bári jaqsy. 276 úi salynǵan. Biraq áńgime sol úidiń sapasynda bolyp tur", - deidi Baqtiiaruly.
Onyń aitýynsha, aýyldaǵy árbir úidi salýǵa biýdjetten 56 myń dollar bólingen. Alaida qurylystyń sapasy syn kótermeidi.
"Men bes úidi kórip shyqtym. Qabyrǵasyn gipsokartonmen salǵan. Tóbesi óte juqa. Fýndament te joq. Qysta qandastarymyzdyń barlyǵy týǵan-týysyn jaǵalap ketedi eken. Ondai úige aqsha tóleý úshin jaǵdai bolýy kerek qoi. Ózim bir tiyn da tólemeitin edim. Keshirim suraimyn, bizdiń ońtústik jaqta ondai úilerde mal da turmaidy. Al olar adam ǵoi, óz baýyrlarymyz", - dep ashyndy Baqtiiaruly.
Búginde "Nurly kóshtiń" úileri qandastarymyzǵa jalǵa berilip otyr. Biraq olar aqysyn tólemeidi, sebebi jaǵdai jasalmaǵan. Jerdi menshikke berse, sapaly úidi ózimiz salyp alamyz dep otyr.
"Sondyqtan bul máseleni sheshýdiń bir ǵana joly bar. Ol – barlyq jer ýchaskesin jekemenshikke berý. Bul sheshiletin dúnie ǵoi. Premer-ministr bul máseleni ulttyq komissiianyń qaraýyna shyǵaramyz dedi. Óitkeni qaryzyn keshirip, jerdi jekemenshikke bermese bolmaidy. Úkimet basshysy aitsa, sheshilýi kerek qoi. Jerdi zańdastyryp beredi. Al qaryzdaryn keshirýi múmkin", - deidi senator.
Aqmola oblysy ákiminiń orynbasary Malǵajdar Tátkeev barlyq úidiń sapasyz salynǵanyn rastady. Jergilikti bilik jerdi jekemenshikke berýge qarsy emes.
"Men osy qyzmetke naýryz aiynda taǵaiyndalǵanmyn. Ol jerge bardym, úilerdi kórdim. Iá, sapasy tómen. Úilerdi qumnan jasalǵan kirpishpen salypty. Ondai material sýyq tartady. Qazir ol jerlerdi jekemenshikke beretin bolsaq, oblystyq biýdjet te aqsha únemdeitin edi. Óitkeni jyl saiyn jóndeý jumystaryna qyrýar qarjy ketedi", - dedi Tátkeev.
"Nurly kósh" shaǵyn aýdanynyń tarihy
2009 jyly Aqmola oblysy Krasnyi Iar aýylynda "Nurly kósh" baǵdarlamasymen 138 eki páterli turǵyn úiler salynǵan bolatyn. Oǵan respýblikalyq biýdjetten 1,5 milliard teńge bólindi. Qurylysqa tapsyrys berýshi – "Saryarqa" kompaniiasynyń enshiles kásiporny. Al qurylys jumystaryn "Kókshetaý óndiris" kompaniiasy atqarǵan.
Budan bólek, oblystyq biýdjetten 281 million teńge bólingen. Ol aqshaǵa elektr jelileri tartylyp, úilerge jeńil jóndeý jumystary jasaldy. Sport alańy salynyp, jol jóndeldi.
"Turǵyn úiler úsh jaqty kelisimshartpen Turǵyn úi qurylys jinaq banki arqyly qandastarymyzǵa taratyldy. Olar páter qunynyń 50 protsentin depozitte jinaýy tiis edi. Odan keiin úidi 4,5 protsenttik mólsherlememen satyp alýǵa múmkindik berildi. Alaida kóptegen salymshy shart talaptaryn oryndamady", - deidi Malǵajdar Tátkeev.
2011 jyly "Esil" áleýmettik-kásipkerlik korporatsiiasynyń balansynda bolǵan úilerdi Kókshetaý ákimdigine aýystyryp, jalǵa beriletin baspananyń sanatyna qosty. Bir sharshy metrin jalǵa alý quny – 88 teńge. Sonda bir úidiń ailyq tólemaqysy 6 866 teńgeni quraidy. Biraq ony birde-bir adam tólemegen. Sebebi barlyǵy qurylystyń sapasyna narazy.
"Qazirgi kezde "Nurly kósh" shaǵyn aýdanynda 1 057 adam turyp jatyr. Onyń 427-si jumys isteidi. 64 adam sábi kútimi boiynsha demalysqa shyqqan. Budan bólek, 39 zeinetker, 191 mektep jasyna deiingi bala, 220 mektep jasyndaǵy bala, 50 stýdent pen 6 múgedek bar", - deidi Tátkeev.
Otandastar qorynyń janyndaǵy qoǵamdyq komissiianyń búgingi otyrysyna Dúniejúzi qazaqtary qaýymdastyǵynyń ókilderi de qatysty. Olardyń aitýynsha, "Nurly kósh" shaǵyn aýdanynda qoǵamdyq tártip durys baqylanbaidy. Sonyń saldarynan qylmys kóbeigen.
"Balabaqsha salamyz degen. Ol joq. Ótkende jaryq ta bolmady. Osy kúzde ólim-jitim kóbeidi. 13 jastaǵy qyz balany óltirip ketti. 11 jasar balany kóshege asyp ketken. Ol jerde ne beinebaqylaý, ne jaryq joq. Jaǵdai jasalmaǵan", - deidi olar.
